विराटनगर (अस) । नेपाल केन्द्रीय साबुन उत्पादक संघले साबुन, अगरबत्ती, ट्वाइलेट पेपरलगायत १० थरी वस्तुको आयातमा प्रतिबन्ध लगाउन आग्रह गरेको छ ।
उद्योग, वाणिज्य तथा आपूर्ति मन्त्रालयले राजपत्रमा सूचना प्रकाशित गरी आगामी असारसम्म आयातमा प्रतिबन्ध लगाएका वस्तुको सूचीमा लुगाधुने साबुन, डिटरजेन्ट पाउडर, डिटरजेन्ट केक, ह्यान्डवास, टिस्यू, ट्वाइलेट क्लिनर, फिनेल, अगरबत्ती, ट्वाइलेट सोप, ट्वाइलेट पेपर नपरेकोले तिनलाई समेत समेट्न संघले आग्रह गरेको हो ।
संघले मन्त्रालयमा बुझाएको पत्रमा ती सामग्रीमा नेपाल आत्मनिर्भर भइसकेकोले आयातमा प्रतिबन्ध लगाउनुपर्ने उल्लेख छ । ती सामानको आयातमा प्रतिबन्ध लगाउँदा विदेशी मुद्राको सञ्चितिमा सकारात्मक योगदान पुग्ने संघको पत्रमा उल्लेख छ । ती वस्तुको आयातमा सरकारले प्रतिबन्ध लगाए पनि गत मंगलबारको राजपत्रमा प्रकाशित सूचनामा छुटेको संघको भनाइ छ ।
