वैशाख ६, काठमाडौं । महालक्ष्मी विकास बैंकले चालू आवको तेस्रो त्रैमासिक वित्तीय विवरण मंगलवार सार्वजनिक गरेको छ ।
उक्त वित्तीय विवरण अनुसार कम्पनीको खुद नाफा गत आवको तेस्रो त्रैमासको तुलनामा चालू आवको सोही अवधिमा ७६ दशमलव ९७ प्रतिशत वृद्धि भएको छ । कम्पनीले गत आवमा रू. ४० करोड ३६ लाख खुद नाफा कमाएकोमा चालू आवको सोही अवधिमा वृद्धि भएर रू. ७१ करोड ४२ लाख पुगेको हो ।
चालू आवको तेस्रो त्रैमासमा कम्पनीको इम्पेरिमेण्ट चार्ज घटि सञ्चालन नाफामा वृद्धि भएकाले र खुद ब्याज आम्दानीमा वृद्धि भएकाले नाफा बढेको हो । खुद ब्याज आम्दानी गत आवको तुलनामा चालू आवमा १५ प्रतिशत वृद्धि भएको छ । त्यसैगरी कम्पनीको इम्पेरिमेण्ट चार्ज गत आवको तेस्रो त्रैमाससम्ममा रू. २७ करोड ३२ लाख रहेकोमा चालू आवको सोही अवधिमा घटेर रू. १५ लाख ७९ हजारमा झरेको छ ।
सोही कारण कम्पनीको सञ्चालन नाफा ८० दशमलव २४ प्रतिशत वृद्धि भई नाफा बढ्न टेवा पुगेको हो । त्यसैगरी कम्पनीको नाफामा वृद्धि भएसँगै प्रतिशेयर आम्दानी पनि वृद्धि भएको छ । गत आवमा कम्पनीको प्रतिशेयर आम्दानी रू. १६ दशमलव १० रहेकोमा चालू आवको सोही अवधिमा बढेर रू. २३ दशमलव ७४ पुगेको छ ।
त्यसैगरी कम्पनीको चुक्ता पूँजी रू. ४ अर्ब १ करोड रहेको छ भने चालू आवको तेस्रो त्रैमाससम्ममा कम्पनीले जगेडामा रू. १ अर्ब ७५ करोड र रिटेण्ड अर्निङमा रू. ४८ करोड ७९ लाख सञ्चित गरेको छ । त्यसैगरी चालू आवको तेस्रो त्रैमाससम्ममा कम्पनीको वितरणयोग्य नाफा ४५ करोड ८३ लाख रहेको छ । सोही अवधिमा कम्पनीको मूल्य आम्दानी अनुपात १७ दशमलव २७ गुणा, प्रतिशेयर नेटवर्थ रू. १५६ दशमलव शून्य ४ र तरलता अनुपात २४ दशमलव ५ प्रतिशत रहेको छ ।
