वैशाख ११, काठमाडौं । उदयपुर सिमेन्ट प्रालिले पछिल्लो तीन महीनाको अवधिमा ४९ करोड रुपैयाँ आम्दानी गरेको छ । उक्त आम्दानी चालू आर्थिक वर्षको छ महीनाको आम्दानी बराबर हो । उद्योगले चालू आवको साउनदेखि पुस मसान्तसम्म ५२ करोड रुपैयाँ आम्दानी गरेको थियो ।
सो अवधिसम्म उद्योगले ६ लाख ९८ हजार ५८६ बोरा सिमेन्ट विक्री गरेको थियो । गोपी न्यौपानेले उद्योगको महाप्रबन्धकको जिम्मेवारी सम्हालेपछिको १०० दिनमा ६ लाख ६० हजार १७३ बोरा सिमेन्ट विक्री भएको हो । चालू आवको साउनदेखि पुससम्मको तुलनामा पछिल्लो १०० दिनमा सिमेन्ट उत्पादन र आम्दानी दुवै वृद्धि भएको उद्योगले बताएको छ ।
उद्योगले पछिल्लो चार वर्षको उत्पादन इतिहास तोड्दै यही वैशाख ६ गते १७ हजार १६४ बोरा सिमेन्ट विक्री गरेको छ । पुस मसान्तसम्म तत्काल तिर्नुपर्ने दायित्व ६६ करोड रुपैयाँ रहेकामा उद्योबाट नै कमाइ गरी सरकारी राजस्व ७ करोड, कर्मचारी सेवा सुविधा भुक्तानी ८ करोड रुपैयाँ, वस्तु आपूर्ति सेवाको भुक्तानी ३० करोड रुपैयाँ, अवकाश कोषमा ४ करोड रुपैयाँ गरी कुल ४९ करोड रुपैयाँ भुक्तानी गरिएको सूचना अधिकारी लक्ष्मणप्रसाद पोखरेलले जानकारी दिए।
उद्योगले यही अवधिमा नेपाल विद्युत् प्रधिकरणलाई भुक्तानी गर्न नसकेको २२ करोड रुपैयाँ भुक्तानीसमेत गरेको छ । सन् १९९४ मा जापान सरकारको सहयोगमा उद्योगको स्थापना भएको थियो ।
२८ वर्षअघि जडान गरिएको प्रविधि बारम्बार बिग्रिरहँदा उद्योगले पटकपटक क्षति व्यहोर्दै आएको थियो । उद्योगले पछिल्लो समय भारतबाट विशेषज्ञ ल्याएर मेसिन मर्मत गर्ने गरेको छ ।
विशेषज्ञले अहोरात्ररूपमा खटिएर ‘ब्रेकडाउन’ कम गर्न सफल भएको उद्योगले बताएको छ । यो अवधिमा क्लिन सेल, मिल र कोलमिलको रोलर मर्मत गरी सञ्चालनमा ल्याइएको छ । लाइनर, ड्राइफार्मलगायत उपकरण भने नयाँ जडान गरिएको छ ।
उद्योगमा कोइला, जिप्सन, आइरनओरलगायत इन्धन तथा कच्चा पदार्थको मौज्दात शून्य हुने अवस्था पनि अहिले समाधान भएको छ । अहिले यार्डमा ५ हजार मेट्रिक टनभन्दा बढी कोइला, १ हजार ५०० मेट्रिक टनभन्दा बढी जिप्सन र १ हजार मेट्रिक टन बढी आइरनओर मौज्दात रहेको सूचना अधिकारी पोखरेलले बताए।
उद्योगले एक वर्षभित्र एसपी (सस्पेन्सन प्रिहिटर) सिस्टमबाट आरएसपी (रिइनफोर्स सस्पेन्सन प्रिहिटर) सिस्टममा परिवर्तन गरी प्रतिदिन ३०० मेट्रिक टन क्षमता बढाई ८०० मेट्रिक टनबाट १ हजार १०० मेट्रिक टन उत्पादन लक्ष्य लिएको छ ।
एक वर्षभित्र एक मेगावाटको सोलार प्लाण्टबाट विद्युत् उत्पादन गरी विद्युतको वैकल्पिक स्रोत प्रयोग व्यवस्था मिलाइने उद्योगले बताएको छ । प्रतिदिन १ हजार १०० मेट्रिक टन उत्पादन गरी सिमेन्ट विक्रीबाट ४ अर्ब रुपैयाँ आम्दानी हुने उद्योगले प्रक्षेपण गरेको छ ।
उद्योगले अर्बौको क्लिङ्कर आयात प्रतिस्थापन गर्ने, नेपालमा स्थापित अन्य उद्योगलाई कच्चा पदार्थका रूपमा गुणस्तरीय क्लिङ्कर उपलब्ध गराउने, भारतको विहारको नेपाल सीमा क्षेत्रमा निकासीको सम्भावना खोजी गरी निकासी गर्न सकिनेजस्ता मुलुकको हितमा हुनसक्ने बहुआयामिक अवसरको उपयोग गर्ने लक्ष्य लिएको सूचना अधिकारी पोखरेलले बताए । रासस
