वीरगञ्ज। देशको मुख्य व्यापारिक नाका वीरगञ्जको एकीकृत जाँच चौकी (आईसीपी) भन्सारले चालू आर्थिक वर्ष (आव) २०८०/८१ को शुरू त्रैमासमा लक्ष्यको ६८ दशमलव ३५ प्रतिशतमात्र राजस्व संकलन गरेको छ । भन्सारले आफ्नो वेबसाइटमा प्रकाशित गरेको तथ्यांकअनुसार चालू आवको साउनदेखि असोजसम्ममा ३८ अर्ब ८५ करोड रुपैयाँ राजस्व उठाएको देखिन्छ । यस अवधिका लागि आईसीपी भन्सारलाई ५६ अर्ब ८४ करोड रुपैयाँ राजस्व उठाउने लक्ष्य दिइएको थियो ।
अघिल्लो आवको सोही अवधिमा उक्त भन्सारले ३९ अर्ब ६२ करोड रुपैयाँ संकलन गरेको थियो । त्यो रकम लक्ष्यको तुलनामा ७० प्रतिशत थियो । सरकारले २०७८ असोजदेखि वैदेशिक व्यापारमा नियन्त्रणको नीति लिएको थियो । अहिले नियन्त्रण हटे पनि व्यापारमा सुधार हुन नसकेको सरोकारका पक्षले बताएका छन् ।
बजारमा माग नहुँदा आयात र उत्पादन घटेको छ । उत्पादन खुम्चिएपछि कच्चा पदार्थको आयात पनि खस्किएको छ । त्यसको प्रभाव भन्सारको राजस्वमा देखिएको भन्सार अधिकारीहरूले बताएका छन् ।
चालू आवको ३ महीनामा आईसीपीबाट सरकारले भन्सार महशुल १४ अर्ब ६४ करोड रुपैयाँ, मूल्य अभिवृद्धिकर १६ अर्ब ४४ करोड रुपैयाँ र अन्त:शुल्क ३ अर्ब २१ करोड रुपैयाँ संकलन गरेको भन्सारको तथ्यांक छ ।
