फागुन ७, काठमाडौं । यो साता धितोपत्र दोस्रो बजारका महत्वपूर्ण सूचकहरुमा कमि आएको छ ।
गत साताको तुलनामा यो साता नेप्से परिसूचक, सेन्सेटिभ इन्डेक्स, कारोबार रकम तथा कित्ता र कुल बजार पूँजीकरण घटेको हो । गत साताभन्दा नेप्से परिसूचक यो साता ६९ दशमलव शून्य ५ अंकले तल झरेको छ । पाँच कारोबार दिनमा यो साता नेप्से परिसूचक तीन दिन घटेको छ भने दुई दिन बढेको छ ।
पहिलो दिन १०० दशमलव ६७ अंक घटेको बजार दोस्रो दिन शून्य दशमलव शून्य ८ प्रतिशत र तेस्रो दिन ५३ दशमलव ३० अंकले बढेको हो ।
त्यस्तै चौथो दिन १९ दशमलव ८४ अंक र पाँचौ दिन १ दशमलव ९४ अंकले बजार घटेको हो । गत साता २ हजार ८०१ दशमलव ५६ विन्दुमा रहेको नेप्से परिसूचक यो साता २ हजार ७३२ दशमलव ५१ विन्दुमा झरेको हो ।
यो साता सेन्सेटिभ इन्डेक्स पनि ८ दशमलव ६४ अंकले घटेको छ । गत साता ५२७ दशमलव २८ विन्दुमा रहेको सेन्सेटिभ इन्डेक्स यो साता ५१८ दशमलव ६४ विन्दुमा झरेको हो । नेप्से परिसूचक घटेसँगै कुल बजारपूँजीकरण रू. ८९ अर्ब ३५ करोड ३६ लाखले घटेको छ । गत साता रू. ३९ खर्ब ५९ अर्ब ६४ करोड ८५ लाख रहेको कुल बजार पूँजीकरण यो साता रू. ३८ खर्ब ७० अर्ब २९ करोड ४९ लाखमा झरेको हो ।
यस साता रू. १८ अर्ब १९ करोड ९० लाख ४७ हजार बराबरको ३ करोड ५२ लाख २४ हजार २५७ कित्ता शेयर कारोबार भएको छ । गत साता भने रू. २४ अर्ब ४४ करोड ४६ लाख २९ हजार बराबरको ४ करोड ५६ लाख ८९ हजार ५५१ कित्ता शेयर कारोबार भएको थियो ।
गत साताको भन्दा यो साता रू. ६ अर्ब २४ करोड ७२ लाख ४४ हजार बराबरको १ करोड ४ लाख ६५ हजार २९४ कित्ता कम शेयर कारोबार भएको हो ।
