७ सय किलोमिटर पारिको खबर । त्राहिमान पार्ने त्रासदीपूर्ण त्यो खबर । क्रूर जातीय हिंसाको खबर । १० जेठ, २०७७– नेपालको इतिहासमै कलंकित दिनको त्यो खबर काठमाडौंका खबर–भित्ताहरूमा घुर्माइलो–घुर्माइलो गरी छाइरहेको थियो । राम्रोसँग नेटवर्क नटिपेको श्यामश्वेत टेलिभिजमा जस्तो– झ्यारझ्यार । त्यसैले गुजिल्टिँदै गएको ६ युवकको हत्याकाण्डका रेसाहरू खुट्याउन एक बथान पत्रकार जाजरकोटतर्फ हिँडेका थियौं ।
