काठमाडौं मोडल कलेज क्यूएए प्रमाणित

काठमाडौं । काठमाडौं मोडल कलेज गुणस्तर सुनिश्चितता तथा प्रत्यायन (क्यूएए)बाट प्रमाणित भएको छ । विश्वविद्यालय अनुदान आयोगले मंगलवार कलेजलाई क्यूएए प्रमाणित गरेको हो । स्थापनाकालदेखि नै गुणस्तरीय शिक्षण सिकाइको प्रवर्द्धन र वकालत गर्दै र त्यसअनुरूप आफ्ना शैक्षिक क्रियाकलाप सञ्चालन गर्दा महत्त्वपूर्ण उपलब्धि हासिल गरेको कलेजको दाबी छ । कलेजको व्यवस्थापन, जवाफदेहिता, क्षमता विकास, सूचना प्रविधिको प्रयोग, अनुसन्धान, पूर्वाधार विकास जस्ता महत्त्वपूर्ण पाटोलाई क्यूएएले मूल्यांकन गर्ने बताइएको छ । यी सबै मापदण्डमा सर्वोत्कृष्ट ठहरिएसँगै आयोगले क्यूएए प्रमाणित गरेको कलेजले जानकारी दिएको छ । ‘राष्ट्रिय तथा अन्तरराष्ट्रिय विज्ञको टोलीले विस्तृत तथा श्रृंखलाबद्ध अनुगमन र मूल्यांकनपछि आयोगले कलेजलाई क्यूएए प्रमाणित गरेको हो,’ कलेजका प्रमुख सुरेन्द्र सुवेदीले भने । उनले कलेजले पाएको उपाधिले थप उत्साहित र जिम्मेवार बनाएको बताए । ‘हामी विश्वस्तरीय व्यावहारिक शिक्षा प्रदान गरी अध्ययनका लागि विद्यार्थी विदेशिने प्रवृत्ति रोक्छौं,’ उनले भने, ‘दक्षिण एशिया लगायत अन्य मुलुकका विद्यार्थीलाई समेत आकर्षित गरी नेपाललाई शैक्षिक हब बनाउन भूमिका निर्वाह गर्छौं ।’ नेपालले २०६४ सालदेखि विश्वविद्यालय अनुदान आयोगमार्फत औपचारिक रूपमा विश्वविद्यालय तथा कलेजलाई क्यूएए प्रमाणित गर्न शुरू गरेको हो ।