काठमाडौं । मुलुकलाई मिटिङ, इन्सेन्टिभ्स, कन्फेरेन्सेस तथा एक्जिभिशन (माइस) तथा विवाह गन्तव्यका रूपमा अघि बढाउन निजीक्षेत्रका होटेल व्यवसायी कार्यनीति बनाउने तयारीमा जुटेका छन् । पछिल्लो समय ‘माइस’ गतिविधिका लागि विदेशी व्यापारी नेपाल आउन थालेको र भारतीयले पोखरालाई विवाह गन्तव्य बनाउन थालेपछि होटेल व्यवसायीले कार्यनीति बनाउन खोजेका हुन् ।
त्यसका लागि होटेल व्यवसायीहरूको छाता संगठन होटेल एशोसिएशन नेपाल (हान)ले भदौ ३१ गते काठमाडौंमा एक कार्यक्रम गर्न लागेको छ । माइस र विवाह गन्तव्य (डेस्टिनेशन वेडिङ)को बढ्दो माग पूरा गर्न कार्ययोजना तयार गर्ने हानले जानकारी दिएको छ । हानका महाससचिव साजन शाक्यले होटेल पूर्वाधार बनिसकेको र बैंक्वेट क्षमता पनि बढेकाले बजारीकरणको काम गर्नुपर्ने बताए । ‘काठमाडौंमा मात्रै नभई बाहिरी गन्तव्यका होटेलहरू पनि त्यस्तो सेवा दिन सक्षम छन्,’ शाक्यले भने, ‘भैरहवामै ३ ओटा ५ तारे होटेल खुलेका छन्, नेपालगञ्जमा पनि छन् ।’ भदौ ३१ को कार्यक्रममा सरकारी अधिकारी, होटेल व्यवसायी, टुर्स एन्ड ट्राभल्स व्यवसायीको सहभागितामा छलफल हुने उनले बताए ।
केही साताअघि बंगलादेशबाट एउटा कम्पनीका ७०० कर्मचारी नेपाल आएका थिए । यसले पनि व्यवसायीलाई उपयुक्त कार्यनीति घचघच्याएको ठानिएको छ ।
हानले वार्षिक कार्ययोजनामै राखेर बजार प्रवर्द्धनका लागि कार्यक्रम गर्न लागेको शाक्यको भनाइ छ । कार्यक्रमले राष्ट्रिय तथा अन्तरराष्ट्रिय स्तरमा नेपाललाई माइस पर्यटनको उपयुक्त गन्तव्यका रूपमा स्थापित गर्न सघाउने बताइएको छ । पर्यटक आगमन बढाउन माइस पर्यटनको विकास गर्न अपरिहार्य रहेको भन्दै उनले थपे, ‘नेपालले विश्वभरका व्यापारिक समुदायमा अन्तरराष्ट्रिय सभा, सम्मेलन गन्तव्यका रूपमा लोकप्रियता कमाएको छ ।’
केही साताअघि बंगलादेशबाट एउटा कम्पनीका ७०० कर्मचारी नेपाल आएका थिए । यसले पनि व्यवसायीलाई उपयुक्त कार्यनीति घचघच्याएको ठानिएको छ । अन्तरराष्ट्रिय स्तरको मेला, सभा/सम्मेलनसँगै प्रोत्साहनस्वरूप कर्मचारीलाई विदेश भ्रमणमा पठाउने प्रचलन विश्वव्यापी रूपमा बढेको छ । छिमेकका भारत र चीनमा पनि यस्तो चलन बढ्दै गएको भन्दै त्यो अवसरलाई नेपालले सदुपयोग गर्नुपर्ने व्यवसायीको भनाइ छ । छिमेकी भारतलगायत देशबाट वर्षेनि हजारभन्दा बढीको संख्यामा विवाह गर्ने जोडी र उनीहरूका परिवारका सदस्य नेपाल आउन थालेको हानको भनाइ छ । यस विधालाई थप लोकप्रिय र फराकिलो बनाउन पनि कार्यक्रम गर्न लागिएको हो ।
नेपालको पहाडी तथा तराईका गन्तव्य, प्राकृतिक ट्रेकिङ क्षेत्र र धार्मिक तथा सम्पदास्थलका ‘प्याकेज’ बनाई मेला, सभा/सम्मेलन, विवाह गन्तव्य तथा प्रोत्साहन भ्रमणमा व्यापारिक घरानालाई आकर्षित गर्न सक्ने सम्भावना बलियो छ । यसका लागि सरकारी नीति, नियम, थप पूर्वाधार, जनशक्ति र प्रभावकारी प्रवर्द्धनका कार्यक्रम आवश्यक पर्ने हानको भनाइ छ ।
