काठमाडौं । विदेशमा काम गरिरहेका पाकिस्तानी कामदारहरूले पठाउने विप्रेषण घटेको छ । मेमा पाकिस्तानमा जम्मा २ अर्ब १० करोड डलर मात्रै विप्रेषण आएको छ । यो अघिल्लो महीनाको भन्दा ४ प्रतिशत कम भएको पाकिस्तानी केन्द्रीय बैंक ‘स्टेट बैंक अफ पाकिस्तान’ (एसबीपी)को तथ्यांकले देखाएको छ ।
मेमा भित्रिएको विप्रेषण गएको वर्षको सोही महीनाको भन्दा १० प्रतिशत थोरै भएको बताइएको छ । चालु आर्थिक वर्षको पहिलो ११ महीनामा अमेरिकी डलरको तुलनामा पाकिस्तानी रुपयाको भाउमा आएको कमीका कारण मात्रै ३ अर्ब ७० करोड डलर बराबरको विप्रेषण खुम्चिएको छ । आर्थिक वर्ष २०२३ को पहिलो ११ महीनामा पाकिस्तानमा कुल २४ अर्ब ८३ करोड १० लाख डलर विप्रेषण आएको छ ।
यो अघिल्लो आवको सोही अवधिको भन्दा १२ दशमलव ९८ प्रतिशत कम हो । विप्रेषण घट्न थालेपछि मुद्रा व्यापारीहरूले सरकारलाई बारम्बार ध्यानाकर्षण गराइरहेका छन् । साउदी अरबदेखि संयुक्त अरब इमिरेट्स अनि बेलायतदेखि अमेरिकासम्म अधिकांश मुख्य विप्रेषण बजारबाट पाकिस्तानतर्फको प्रवाह घटेको छ ।
आधिकारिक बजारमा डलरको आपूर्ति सीमित भएकै समयमा डलरको कालोबजारी चर्किएको छ । विप्रेषण पठाउनेहरू पनि कालो बजारतिर आकर्षित हुन थालेपछि वैध च्यानलमार्फत आउने विप्रेषण घटेको छ । यसले डलरको भाउ झनै प्रभावित भइरहेको छ । पाकिस्तानको अन्तर बैंक बजारमा अहिले एक डलर किन्न २८६-२८७ रुपया खर्च गर्नु परिरहेको छ । तर, कालो बजारमा यो दर ३११-३१३ रुपया छ । एजेन्सी