वर्षात्को समय सुरु हुनै लाग्दा रासायनिक मल (युरिया) को अभाव भएपछि वीरेन्द्रनगर नगरपालिका–११ का किसान कलवीर चौधरीलाई उत्पादन घट्ने चिन्ता छ । रोपाइँ सुरु नहुँदै मल अभाव झेलेका उनले यसपटक वर्षभरि पुग्ने खाद्यान्न उत्पादन नहुने गुनासो गरे । अँधियामा धान खेती गरेका वीरेन्द्रनगर–३ का कमल रिजाल पनि मल नपाउँदा चिन्तित छन् । ‘अहिलेको जस्तो दुःख त कहिल्यै पाएको थिएनौँ,’ उनले भने, ‘खेती सुरु हुने बेला मल पनि छैन, खेत रोप्ने बेलासम्म मल आएपनि धेरै सहज हुने थियो ।’ मानो रोपेर मुरी फलाउने समयमा रासायनिक मल अभाव भएपछि किसानहरूको चिन्ता बढेको हो ।
