नेपालमा विकासका योजनामा अपेक्षित लक्ष्य प्राप्त गर्न नसक्नुमा पुँजीगत बजेट खर्च हुन नसक्नुलाई प्रमुख कारण मानिन्छ । पुँजीगत बजेट खर्च नभएपछि कुल गार्हस्थ उत्पादन बढ्न सक्दैन । कुल गार्हस्थ उत्पादन नबढ्नु समग्र विकासको सूचकाङ्क प्रभावित हुनु हो । पुँजीगत (विकास बजेट) खर्च हुन नसक्दा मुलुकको अर्थतन्त्रमा नकारात्मक प्रभाव देखिने भएकाले यस्तो खर्च बढाउँदै एकातिर आर्थिक सूचकाङ्कका ग्राफलाई उध्र्वगति दिन सकिनेछ भने अर्कोतिर आमनागरिकलाई भौतिक पूर्वाधार, सेवा, सुविधा तथा विकासका प्रतिफल प्रदान गर्न सकिनेछ । सर्वसाधारणको विद्यमान सामाजिक–आर्थिक अवस्थामा सकारात्मक परिवर्तन गर्दै गुणात्मक बनाउनु नै विकास भएकाले त्यसका लागि राज्यले विनियोजन गरेको बजेट परिचालन (खर्च) हुन सकेन भने मुलुकको विकास गति धीमा हुनपुग्छ ।
