‘अख्तियारले दायर गरेका मुद्दामा सफलता प्राप्त गर्न कठिनाइ र उजुरी फस्र्योटमा समेत ढिलाइ’
पछिल्लो पञ्चवर्षीय योजनाको मध्यावधि समीक्षा अवधिमा भ्रष्टाचार अनुभूति सूचकांक ३४ बाट ३३ मा झरे पनि लक्ष्यअनुरूप उपलब्धि हासिल नभएको राष्ट्रिय योजना आयोगको भनाइ छ।...
वीरगञ्ज । सरकारले राजस्व चुहावट नियन्त्रणका लागि भन्दै एकपछि अर्को उपाय अपनाइरहँदा सरकारकै एउटा निकायमा परेको कर छलीसम्बन्धी उजुरीको सुनुवाइ हुन सकेको छैन । वीरगञ्जका एक व्यवसायीले आन्तरिक राजस्व विभागमा दिएको उजुरीमा १ वर्ष बित्न लाग्दा पनि सुनुवाइ नभएको हो ।
स्वदेशमा खुलेका केमिकलमा आधारित ट्वाइलेट क्लिनर, ≈यान्डवास, ग्लास क्लिनर, फ्लोर क्लिनर, भाँडा र लुगा धुने तरल तथा पाउडर उत्पादकले अन्त:शुल्क, मूल्य अभिवृद्धिकर र आयकर छलेको भन्दै गतवर्षको चैत २० मा विभागमा उजुरी दर्ता भएको थियो ।
वीरगञ्ज, विराटनगर, काठमाडौंलगायत स्थानमा सञ्चालनमा रहेका ३१ उद्योगको नामै किटेर उजुरी गर्दासमेत विभागले अनुसन्धान अघि नबढाएको गुनासो ती उद्यमीको छ । उद्योगहरूको नाम, स्थायी लेखा नम्बर, ठेगाना र सम्पर्क नम्बरसमेत उल्लेख गरेर उजुरी दिँदा पनि विभागले छानविन नगरेको ती उद्यमीले गुनासो गरे ।
विभागको स्थानीय कार्यालयमा उजुरी गर्दा सुनुवाइ नभएपछि उजुरीकर्ता विभागमा पुगेका थिए । स्वदेशमा उत्पादन हुने एचएस कोड ३४०१ र ३४०२ का ती वस्तुमा ५ प्रतिशत अन्त:शुल्क लाग्ने भए पनि सरकारी निकायले प्रभावकारी अनुगमन नगर्दा कर छली भइरहेको दाबी उजुरीकर्ताको छ ।
यस्ता उद्योगले कमसल उत्पादन बजारमा पठाएर उपभोक्तालाई ठगेको उजुरीकर्ताको दाबी छ । कर छल्ने अधिकांश उद्योगलाई आन्तरिक राजस्व विभागले छानविनको दायरामा नल्याउँदा नियमअनुसार लाग्ने कर तिरेर सञ्चालनमा रहेका उद्योगलाई प्रतिस्पर्धामा कठिनाइ भइरहेको उजुरीकर्ताको भनाइ छ ।
पर्सा । पछिल्लो समय पर्साको वीरगञ्ज नाका मानव बेचबिखनका लागि मुख्य ‘ट्रान्जिट प्वाइन्ट’ बन्न थालेको पाइएको छ । मानव तस्करले बेचबिखन गर्ने उद्देश्य राखेर आफै विवाह गर्ने, भारतीय नागरिकसँग विवाह गराइदिनेलगायत प्रलोभनमा पारी बालबालिका, किशोरी तथा महिलालाई उक्त नाका हुँदै भारतका विभिन्न शहरमा पुर्याउने गरेको पाइएको छ ।
पर्सामा मानव बेचबिखनको घटनासम्बन्धी तथ्यांकअनुसार चालू आर्थिक वर्षको ६ महीना अवधिमा ७३ जनाको भारतका विभिन्न ठाउँबाट प्रहरीले उद्धार गरी नेपाल फर्काएको छ । गत साउनदेखि पुस मसान्तसम्ममा भारतका विभिन्न स्थानबाट ५९ महिला र १४ बालिकाको उद्धार गरिएको प्रहरी नायब उपरीक्षक दीपक गिरीले जानकारी दिए ।
आर्थिक वर्ष २०७८/७९ मा पर्सा प्रहरीले भारतको विभिन्न शहरबाट १११ महिला, ४१ बालिका र ३८ बालकको उद्धार गरेको थियो । आर्थिक वर्ष २०७७/७८ मा ८५ महिला, २२ बालिका र एकबालकको उद्धार गरिएको गिरीले बताए । आर्थिक वर्ष २०७८/७९ मा १०८ महिला, १३३ बालिका, ४५ बालक र चार ज्येष्ठ नागरिक पर्साबाट हराएको उजुरी दर्ता भएकोमा १०५ महिला, १०८ बालिका, ४३ बालक र तीन ज्येष्ठ नागरिक फेला परेका प्रहरीले बताएको छ ।
आर्थिक वर्ष २०७७/७८ मा वीरगञ्ज नाका हुँदै पर्सामा ६५ महिला, ३१ बालक, ९३ बालिका र सात ज्येष्ठ नागरिक हराएको उजुरी प्रहरीमा परेको थियो । तीमध्ये ६१ महिला, २९ बालक, ९० बालिका र सात ज्येष्ठ नागरिक फेला परेका प्रहरीको तथ्यांकमा उल्लेख छ ।
बेचबिखनमा परेका बालबालिका, किशोरकिशोरी तथा महिलाको उद्धारमा कठिनाइ हुने गरेको मानव उद्धारमा सक्रिय संरक्षण नेपालका अध्यक्ष वृजमोहन कुश्वाहाले बताए । ‘दुवै देशको ऐन प्रभावकारी नभएकाले उद्धारमा कठिनाइ भइरहेको छ,’ उनले भने । संरक्षण नेपालका पारस प्रसादले भारतका विभिन्न संघसंस्था र प्रहरीसँग समन्वय गरी चालू आर्थिक वर्षको ६ महीनामा ३७ बालक र १८ बालिका उद्धार गरिएको जानकारी दिए । रासस
