भदौको अन्तिम साताबाट दर्किरहेको झरीले अप्रत्याशित क्षति गरिरहेको छ । तुलनात्मक रुपमा पहिरो र बाढीका जोखिम कम भएका ठाउँहरुमा यसपालीको दशैँ वर्षाले हिलाम्मे बनाउने हो कि भन्ने चिन्ता छ । साउनमा औसत भएको वर्षा भदौको अन्तिम साताबाट एकाएक बढ्यो । नेपालमा सामान्यताय, औसतमा जुन १० मा प्रवेश गरेर सेप्टेम्बर २३ सम्म मनसुन कायम रहन्छ । तर, अहिले हरेक दिन दर्किने झरी हेर्दा मनसुन अझै केही दिन सक्रिय रहने अनुमान गर्न सकिन्छ । यसपाली जुन ५ मै प्रदेश नम्बर १ हुँदै नेपालमा मनसुन प्रवेश गरेको थियो । त्यस आधारमा सेप्टेम्बर १८ पछि मनसुन निष्क्रिय हुने अनुमान थियो । तर, अझै पनि मनसुन सक्रिय छ ।दशैँ हिलाम्मे हुन्छ ?मौसम विज्ञान विभाग अन्तर्गतको मौसम पूर्वानुमान महाशाखाले यसपाली मनसुन बाहिरिने मिति तोक्न सकेको छैन । तर, सक्रिय मनसुन अक्टुबर छोएर मात्रै बाहिरिने अनुमान गरिएको छ ।मनसुनको न्यून चापीय रेखा बिस्तारै हट्दै गएपछि र दक्षिण पूर्वी हावा नभई पश्चिमी हावा बहन थालेपछि मात्रै मनसुन हट्दैछ भन्न सकिन्छ । तर, अहिले यस्तो कुनै संकेत देखिएको छैन । त्यसैले, अझै १० दिन जति मनसुन सक्रिय रहने अनुमान गरिएको छ । १० दिन मनसुन सक्रिय रह्यो भने अक्टुबर १ बाट क्रमशः बाहिरिन्छ । यो भनेको फुलपातीको अघिल्लो दिन ।यसपाली विगत वर्षभन्दा बढी वर्षा हुने अनुमान गरिए अनुसार नेपालमा अक्टुबर २ सम्म मनसुन रहन सक्ने अनुमान भएको थियो । सोही मितिलाई औसत मिति मानेर एक वा दुई दिन अघि पछिबाट मनसुन बाहिरिन सुरु गर्ने अनुमान गरिएको मौसमविद् सञ्जीव अधिकारी बताउँछन् ।सेप्टेम्बर २७ अर्थात् असोज ११ गतेसम्म देशभर मौसम सामान्य बदली रहने छ ।फुलपातीको दिनबाटै मनसुन बाहिरिन सुरु गर्यो भने पनि दशैँको टिकाको दिनतिर बाट मात्रै खुला हुनेछ ।
