काठमाडौं । बंगलादेश र भारतले भारतीय रुपया (भारु)मा व्यापार गरेका छन् । मंगलवार दुई देशीय व्यापारमा भारुमा भुक्तानी भएको छ ।
विदेश व्यापारमा अमेरिकी डलरमाथिको निर्भरता कम गर्न र क्षेत्रीय मुद्रा अनि व्यापारलाई बलियो बनाउन सो पहल गरिएको छ ।
बंगलादेश विदेश व्यापारमा डलरबाहेक अन्य मुद्रामा भुक्तानी गरेको यो पहिलो पटक हो । भारुमा भुक्तानीलाई बंगलादेश बैंकका गभर्नर अब्दुर रौफ तालुकदेरले महान यात्राको पहिलो कदमको संज्ञा दिएका छन् ।
भारुमा व्यापार शुरु भएसँगै अब विस्तारै बंगलादेशी मुद्रा टाकामा पनि भुक्तानी शुरु हुनेछ ।
विनिमय दर भने बजारको माग र भुक्तानी प्रक्रियामा संलग्न बैंकहरूका आधारमा निर्धारण गरिने बताइएको छ । भारतसँगको विशाल व्यापार घाटाका कारण यो कदमले बंगलादेशलाई भने खासै फाइदा नहुने कयौं अर्थशास्त्रीहरूले बताइरहेका छन् । एजेन्सी
