नवलपुर । नवलपरासी (बर्दघाट–सुस्तापूर्व)को मध्यविन्दु नगरपालिकाले नगरभित्र तीन करोडभन्दा बढीको योजना थप गरेको छ । नगरपालिकाको दशौं नगरसभाका क्रममा सो रकम बराबरका नगरस्तरीय योजना थप गरिएको हो ।
नगर उपप्रमुख ओमकुमारी महतोका अनुसार समपूरक बजेटबाट थप भएका योजनामा गिरुबारी खोला र अरुणखोला तटबन्धनका लागि एक/एक करोड विनियोजन भएको छ । गत कायितक पहिलो साता गिरुबारी र अरुणखोलामा आएको बाढीले धेरै क्षति गरेको थियो ।
नगरसभाले अनुमानित राजस्व तथा अनुदान प्रायितसमेत संशोधन गरेको छ । यसअघिको नगरसभामा अनुमानित आय एक अर्ब दुई करोड ३५ लाख रहेकोमा बिहीवार सम्पन्न नगरसभाले उक्त रकम संशोधन गरी एक अर्ब पाँच करोड ४२ लाख पारित गरेको छ । चालू आर्थिक वर्ष २०७८/७९ को बजेट कार्यान्वयनको अर्धवार्षिक प्रगति समीक्षा प्रस्तुत गर्दै २०७८ पुस १५ गतेसम्म चालूतर्फ २४.१३ प्रतिशत र पूँजीगततर्फ ५.५४ प्रतिशत रकम खर्च भएको उपप्रमुख महतोले जानकारी दिइन् । यस अवधिमा चालूतर्फ १३ करोड १३ लाख ७६ हजार तथा पूँजीगततर्फ दुई करोड ६६ लाख खर्च भएको उनले बताइन् ।
नगरसभामा नगरप्रमुख चन्द्रबहादुर रानाले सबै वडामा स्वास्थ्य संस्थाको स्थापना, सडक पूर्वधारको निर्माण, खानेपानी आयोजना, नगरको सुविधा सम्पन्न आफ्नै भवन, विभिन्न ठूला योजनाको लागि विस्तृत परियोजना प्रतिवेदन (डिपिआर) तयारलगायत काम भएको बताए ।
