ओखलढुङ्गा । जिल्लामा पहिलो पटक साहसिक साइकल दौड प्रतियोगिता गरिएको छ । जिल्ला सदरमुकाममा आयोजना गरिएको प्रतियोगितामा देश तथा विदेशका गरी ६२ जना प्रतियोगी सहभागी भएका थिए ।
चार विधामा प्रतिस्पर्धा गराइएको आयोजक ओखलढुङ्गा जिल्ला साइक्लिङ संघका अध्यक्ष राम शाक्यले बताए । इलिट पुरुष, इलिट महिला, मास्टर ए, बी र जुनियर विधामा प्रतियोगिता गराइएको उनले जानकारी दिए ।
इलिट पुरुषतर्फ क्रिस्टोफर अशोक केलिङ्ग प्रथम, निरव श्रेष्ठ दोश्रो र प्रचित थापा मगर तेश्रो भए । उनीहरूले क्रमशः ४ मिनेट ११ सेकेन्ड, ४ मिनेट १७ सेकेन्ड र ४ मिनेट १८ सेकेन्डमा निर्धारित ३.२ किलोमिटरको दुरी पार गरे । उक्त विधामा २५ जनाले भाग लिएका थिए ।
इलिट महिलातर्फ निश्मा श्रेष्ठ प्रथम, अन्जा क्यामेनजिन दोश्रो र लक्ष्मी मगर तेश्रो भइन् । ५ जना सहभागी भएको उक्त प्रतियोगितामा श्रेष्ठ र क्यामेनजिनले ५ मिनेट ८ सेकेन्ड र मगरले ५ मिनेट २२ सेकेन्डमा उक्त दूरी पार गरे ।
यस्तै, मास्टर एतर्फ उमङ्ग श्रेष्ठ प्रथम, सन्तोष राई दोश्रो र मनोज श्रेष्ठ तेश्रो भए । उनीहरूले क्रमशः ४ मिनेट ५० सेकेन्ड, ४ मिनेट ५२ सेकेन्ड र ५ मिनेट १ सेकेन्डमा दुरी पार गरे । मास्टर बीतर्फ अनुप गुरुङ प्रथम, जोनाथन स्टुड दोश्रो र विकास महर्जन तेश्रो भए । गुरुङले ४ मिनेट ४६ सेकेन्ड, स्टुडले ४ मिनेट ५१ सेकेन्ड र महर्जनले ४ मिनेट ५२ सेकेन्डमा उक्त दुरी पार गरे । यी दुवै विधामा ८–८ जनाले भाग लिएका थिए ।
जुनियर (१८ वर्षमुनि) को प्रतियोगितामा बिपुल थापा प्रथम, अनिस तामाङ दोश्रो र श्रीनेश श्रेष्ठ तेश्रो भए । थापाले ४ मिनेट २९ सेकेन्ड, तामाङले ४ मिनेट ४२ सेकेन्ड र श्रेष्ठले ४ मिनेट ५८ सेकेन्डमा उक्त दुरी पार गरे ।
चारै विधाका विजेतालाई जनही दुई लाख पुरस्कार प्रदान गरिएको शाक्यले जानकारी दिए ।
