वैशाख ६, चितवन । चितवनका चार ओटा मालपोत कार्यालयमध्ये सबैभन्दा बढी व्यस्त र बढी कारोबार हुने भरतपुर मालपोत कार्यालयमा सेवाग्राहीको चाप ह्वात्तै घटेको छ ।
तरलता अभाव भएसंँगै बैंकले ऋण प्रवाह गर्न बन्द गरेपछि राजस्व संकलन पनि सुस्त भएको छ । कार्यालयका अनुसार चैतमा १३ करोड ७६ लाख रुपैयाँमात्रै राजस्व संकलन भएको छ भने फागुन महीनामा राजस्व संकलन १६ करोड २४ लाख ६८ हजार रुपैयाँ रहेको थियो ।
माघ महीनामा भने १४ करोड ३२ लाख ५७ हजार रुपैयाँ राजस्व संकलन भएको उक्त कार्यालयले जानकारी दिएको छ ।
मालपोत कार्यालय भरतपुरका कर अधिकृत हेमकुमार तिमल्सिनाले बैंकले घरजग्गा कारोबारमा लगानी गर्न छोडे लगत्तै कारोबारमा ह्रास आउँदा राजस्व संकलनमा पनि असर परेको बताए । राजस्व संकलन अघिल्ला महिनाहरुको तुलनामा करीब ७० प्रतिशत गिरावट आएको उनको भनाइ छ । कोरोना कहरका कारण आर्थिक शिथिलता बढ्नु र चितवनका जग्गाको भाउ बढ्दै जानुले पनि कारोबारमा ह्रास आएको उनले बताए ।
उनका अनुसार दैनिक ३५० भन्दा बढी लिखत पास हुने गरेकोमा अहिले घटेर आधाभन्दा कम लिखत पास हुने गरेको छ । ‘अहिले विदेश जानेको जग्गा रोक्का, अंशवण्डा राजीनामा मात्रै पास हुने गरेको छ’, उनले भने ।
मालपोत कार्यालय नजिक नमस्ते धवलागिरी लेखापढी परामर्श केन्द्र सञ्चालन गरेका गोपाल कंडेल अघिल्ला महीनाहरुमा भन्दा हालका महीनाहरुमा घरजग्गा कारोबार क्रमश : घट्दै गएको बताए ।
‘पहिले केन्द्रमा बिहानै ९ बजेदेखि बेलुका ५ बजेसम्म सेवाग्राहीको चाप हुन्थ्यो अहिले सुनसान जस्तै छ, को आउला भनेर कुर्नुपर्ने अवस्था छ’, कंडेलले भने ।
कार्यालयले आर्थिक वर्ष २०७६/ ७७ को जम्मा राजस्व ९८ करोड ३१ लाख ५५ हजार रुपैयाँ थियो ।
२०७७/ ७८ मा १ अर्ब ३७ करोड ७४ लाख रुपैयाँ राजस्व संकलन भएकोमा चालू आर्थिक वर्षको चैत महीनासम्ममा १ अर्ब ५६ करोड रुपैयाँ राजस्व संकलन भएको मालपोत कार्यालयले बताएको छ ।
घरजग्गाको मूल्य वृद्धि र कोरोना कहर हटेपनि राजस्व संकलन पहिलेका वर्षहरु भन्दा बढी देखिएपनि चालू आर्थिक वर्षमा राजस्व संकलन लक्ष्य अनुसार संकलन हुन नसकेको तिमल्सिनाको भनाइ छ ।
