चितवन । पछिल्लो समय चितवन राष्ट्रिय निकुञ्जमा पर्यटनको चहलपहल बढ्न थालेको छ । कोरोनाको कारण निकुञ्जमा पर्यटनको संख्यामा कमी आएको थियो । पछिल्लो समय कोरोना महामारी मत्थर भएसँगै पर्यटनको संख्या पनि बढ्न थालेको निकुञ्जले जानकारी दिएको छ ।
चालू आर्थिक वर्ष २०७८/७९ को फागुनसम्म निकुञ्जमा संख्या १ लाख ८ हजार २५४ जना पर्यटकले निकुञ्जमा भ्रमण गरिसकेका छन् । उक्त संख्या गत आर्थिक वर्ष २०७७/७८ को सोही अवधिको तुलनामा बढी रहेको निकुञ्जले जानकारी दिएको छ । गत आर्थिक वर्षको सोही अवधिमा निकुञ्ज भ्रमण गर्ने पर्यटनको संख्या ९२ हजार २०९ थियो ।
निकुञ्जका अनुसार अघिल्लो आर्थिक वर्ष २०७६/७७ मा १ लाख ८२ हजार ४३५ व्यक्तिले निकुञ्ज भ्रमण गरेका थिए । निकुञ्जका सूचना अधिकारी गणेशप्रसाद तिवारीका अनुसार चालू आवको पहिलो ८ महीनामा ५ हजार ३९४ जना विदेशी पर्यटकले निकुञ्ज भ्रमण गरेका छन् । विदेशी पर्यटकको सो संख्यामा २ हजार ५४० महिला र २ हजार ८५४ पुरुष रहेको निकुञ्जको तथ्यांक छ ।
निकुञ्जका अनुसार चालू आर्थिक वर्षमा ४ हजार ८६५ जना सार्क मुलुकका पर्यटकले निकुञ्ज भ्रमण गरेका छन् । गत आवमा सार्क मुलुकका विदेशी पर्यटकको संख्या १ हजार ३६४ रहेको थियो । सो आर्थिक वर्षमा सार्कबाहेक अन्य मुलुकका १ हजार २४४ जनाले निकुञ्जको भ्रमण गरेका थिए । रासस
