साझाका विद्युतीय बस पहिलो चरणमा तीन ओटा आउँदै, चैतदेखि परीक्षण हुने

फागुन १०, काठमाडौं । साझा यातायातका बन्दै गरेका ४० ओटा बसमध्ये तीन ओटा बस आगामी चैत महीनाभित्र नेपाल आइसक्ने भएका छन् । पहिलो चरणमा तीन ओटा विद्युतीय बस आउन लागेका हुन् ।  साझाका बिजुली बस चीनको नयान्जिंगस्थित कारखानामा तयारीको क्रममा रहेको साझा यातायात सहकारी संस्थाका अध्यक्ष कनकमणि दीक्षितले बताएका छन् । हाल तीन ओटा विद्युतीय बस आउने र उपत्यकाका सडक र रूटमा प्रशिक्षण सफल भएपछि बाँकी ३७ ओटा बस आउने उनले जानकारी दिएका छन् । सरकारी स्वामित्वको साझा यातायातले ४० ओटा विद्युतीय बस खरीद गर्न लागेको हो । दीक्षितले सामाजिक सञ्जाल फेसबुकमा तयारी अवस्थामा रहेको बसको फोटो सार्वजनिक गर्दै यसबारे जानकारी दिएका हुन् । ‘बिजुली यातायात शुरू गर्न हामी प्रतीक्षामा छौं । लुम्बिनी बिकास कोषले मगाएको तीन ओटा बिजुली बस सम्झौतामा साझा यातायातले चलाउन लागेको थियो तीन वर्षअघि, उद्घाटन पनि भयो, तर बस आयात कागजातको कारण बस सडकमा ल्याउने अनुमति मिल्न गएन । बिजुली परिवहनको शुरुवात भनेर तामझामका साथ उद्घाटन गरेका थियौं त्यति बेला, तर अड्को आइलाग्यो । यसपाली साझाको आफ्नै बस आउँदैछन्, उत्साहित छौं !’, दीक्षितले लेखेका छन् । साझा यातायातले विगत तीन वर्षदेखि विद्युतीय बस खरीद प्रक्रिया अगाडि बढाएको भएपनि सरकारले समर्थन नगर्दा ढिलाई हुँदै आएको थियो । गत वर्ष ३०० ओटा बिद्युतीय बस खरीद गर्न साझालाई सरकारले ३ अर्ब रुपैयाँ उपलब्ध गराएको थियो । तर, सो रकम फिर्ता लगेर पुन : साझा यातायातलाई नै फर्काएपछि विद्युतीय बस खरीद प्रक्रिया अघि बढेको थियो । विद्युतीय बस खरीदका लागि विभिन्न स्पेसिफिकेसनसहित खरीद प्रक्रिया अगाडि बढेको थियो । नेपाल आउन तयारी भएका विद्युतीय बस २५ सिटभन्दा माथिका हुने छन् । साझाले पटक पटक विद्युतीय बस खरीद प्रक्रिया अघि बढाए पनि सरकार नै बाधक बन्दा बस भित्रिन सकेका थिएनन् ।