रोल्पा (अस) । रोल्पाको सदरमुकाम लिबाङ नजिकै रहेको कालीपोखरीलाई नयाँ पर्यटकीय गन्तव्यको रूपमा विकास गर्न थालिएको छ । रोल्पा नगरपालिका–४ स्थित सामुदायिक वनमा पर्ने कालीपोखरीलाई आन्तरिक पर्यटकीय स्थलको रूपमा विकास गर्न स्थानीयवासी जुटेका छन् ।
प्राकृतिक रूपमा सुन्दर रहेको कालीपोखरीको धार्मिक रूपमा पनि उत्तिकै महŒव रहेकाले यसको प्रवर्द्धनमा आफूहरू जुटेको स्थानीय बासिन्दाको भनाइ छ । विशेषगरी लकडाउनको समयमा आन्तरिक पर्यटन प्रवर्द्धनको परिकल्पना गरिएको नेपाल पत्रकार महासंघ रोल्पाका निवर्तमान अध्यक्ष तथा स्थानीय महेश न्यौपानेले बताए । आफ्नो पुख्र्यौली खेतबारी नियाल्न गाउँ पुग्ने क्रममा नयाँ सोचाइको विकास भएसँगै आफूहरूले पर्यटन विकासका लागि योजना बनाएको उनको भनाइ छ । कालीपोखरीको विकासका लागि रोल्पा नगरपालिकाले समेत चासो दिएको छ । उक्त क्षेत्रमा आन्तरिक पर्यटक वनभोज जाँदा बस्ने टहरा निर्माण भएको छ भने शौचालय निर्माण समेत शुरू भएको छ ।
