देशभर गरिबी, अशिक्षा, बेरोजगारी, विभिन्नखाले हिंसाबाट महिलाले मुक्ति पाउनुपर्छ भनेर नारी दिवस मनाउँदै गर्दा दैलेखको आठबिस नगरपालिका– ३ निमाइलकी सुकु बडुवाल भने घरेलु हिंसाकै कारण चार सन्तानसहित कर्णाली नदीमा हामफाल्न विवश बनिन्।
मदिरा सेवनका कारण मानसिंह बडुवालले श्रीमतीसहित चारै सन्तानलाई लगातार तनाव दिएपछि सोमबार साँझ सुकु बडुवाल आफ्ना सन्तान साथमै लिएर घरबाट निस्किइन् । गाउँमा माइत गइन् होला भनेर सोच गरेका गाउँले एक्कासि पाँचैजना कर्णाली नदीमा डुबेको भन्ने खबर पाएपछि स्तब्ध बने ।
आमा सुकु बडुवाल र आठ वर्षीया छोरा ललित बडुवालको शव मंगलबार दिउँसो फेला परेको दैलेखका सहायक प्रमुख जिल्ला अधिकारी हरि देवकोटाले जानकारी दिए । १५ वर्षीया कल्पना बडुवाल र १२ वर्षीया सरिता बडुवालको शव अछामको पञ्चदेवल विनायक नगरपालिका– ४ कर्णाली नदीमा सोमबारै साँझ भेटिएको हो । जलारीले जाल हाल्ने क्रममा शव भेटिएपछि प्रहरीलाई खबर गरेको बताइएको छ ।
