काठमाडौं । ‘सातौं चितवन अन्तरराष्ट्रिय औद्योगिक प्रदर्शनी २०८०’ वैैशाख २२ देखि २४ गतेसम्म चितवन प्रदर्शनी केन्द्र भरतपुरमा हुने भएको छ । चितवन उद्योग संघको आयोजना, नेपाल उद्योग परिसंघको प्रवर्द्धन सहयोग, मिडिया स्पेस सोलुसन्स प्रालि र फ्युचरेक्स ट्रेड फेयर एण्ड इभेन्टको व्यवस्थापकीय साझेदारीमा प्रदर्शनी हुने भएको हो । उद्यमशीलता विकास र औद्योगिक उत्पादकत्व वृद्धिमा सहयोग गर्ने उद्देश्यले प्रदर्शनी आयोजना गरिएको आयोजकले जानकारी दिएको छ ।
परिसंघका अध्यक्ष विष्णुकुमार अग्रवालले अर्थतन्त्र चुनौतीपूर्ण अवस्थामा रहेको बेलामा उद्योगी व्यवसायीको मनोबल बढाउनुपर्ने खाँचो रहेको बताए । कठिन परिस्थितिमा समेत चितवन उद्योग संघले गर्ने अन्तरराष्ट्रिय औद्योगिक प्रदर्शनीले उद्योगी व्यवसायीलाई सकारात्मक सन्देश दिने उनको भनाइ छ । प्रदर्शनी आयोजक चितवन उद्योग संघका अध्यक्ष त्रिलोचन कँडेलले प्रर्दशनी नेपाली उद्यमीलाई नयाँ प्रविधिबारे जानकारी गराउँदै युवालाई उद्यमशीलतामा प्रोत्साहन गर्न, नयाँ उद्यमी जन्माउन सहयोग गर्न उपयुक्त माध्यम बन्ने विश्वास व्यक्त गरे ।
प्रदर्शनीमा निर्माण, कृषि, अटोमोबाइल, फर्निचर, इञ्जिनीयरिङ, मेटल, फर्मास्युटिकल्स, टेक्सटाइल, प्रिन्ट्रिङ, प्याकेजिङ, प्लाष्टिक, पर्यटन, फूड एण्ड बेभरेजेज तथा अन्य सेवामूलक उद्योगको उत्पादन र सेवाका प्रदर्शनी हुने उनले जानकारी दिए । यी उद्योगलाई उपयोगी हुने आधुनिक मेशिन, यन्त्र उपकरण र प्रविधिको प्रदर्शनीसहित राष्ट्रिय तथा अन्तरराष्ट्रिय गरी २०० भन्दा बढी स्टल रहने आयोजकको भनाइ छ ।
