अर्थतन्त्र बढ्ने आशामा ८४ % जापानी कम्पनी

पुस २१, टोकियो (जापान) । यस वर्ष जापानी अर्थतन्त्रको आकार बढ्नेमा अधिकांश ठूला ठूला कम्पनीहरु आशावादी पाइएका छन् ।  कोरोना भाइरसको महामारी घट्ने अनि निजी खपतमा हुने वृद्धिले आर्थिक वृद्धिदरलाई टेवा दिनेमा ८४ प्रतिशत कम्पनीहरु आशावादी छन् । क्योदो न्यूजले हालै गरेको सर्वेक्षणले यस्तो देखाएको छ ।  महामारीबारे जापानी जनताहरुमा सतर्कता कायम रहेकोतर्फ औंल्याउँदै  सहभागीमध्ये १३ प्रतिशतले अर्थतन्त्र झिनो दरमा बढ्ने बताएका छन् ।  सर्वेक्षणमा सहभागी भएको मध्ये ८४ ओटा कम्पनीले यस वर्ष अर्थतन्त्र मध्यम दरमा बढ्ने बताएका छन् । अर्थतन्त्र तीव्र दरमा बढ्ने आशा व्यक्त गर्ने कम्पनीको संख्या ५ छ । सहभागी मध्ये कसैले पनि अर्थतन्त्रमा संकुचन आउने बताएका छैनन् ।  सर्वेक्षणमा सहभागीहरुसँग बहुउत्तर मागिएको थियो । यस क्रममा सहभागी मध्ये ९१ प्रतिशतले उपभोक्ता खर्चमा भएको वृद्धिलाई वृद्धिको कारक बताएका छन् ।  ४ प्रतिशतले महामारीले गर्दा उत्पन्न असामान्य अवस्था सामान्य बन्दै जाने र आर्थिक वृद्धिदरले टेवा पाउने अभिव्यक्ति दिएका छन् । पूँजीगत खर्च बढ्दा आर्थिक वृद्धिदरले टेवा पाउने आशा व्यक्त गर्नेको संख्या ३५ प्रतिशत छ । १९ प्रतिशतले भने जापानको मुख्य व्यापार साझेदार अमेरिकाको अर्थतन्त्रमा आएको पुनःबहालीलाई औंल्याएका छन् । समग्रमा अर्थतन्त्रको आकार बढ्छ भनेर प्रक्षेपण गर्ने कम्पनीको समग्र प्रतिशत ७४ प्रतिशत छ ।  आर्थिक वृद्धिदर स्थिर रहने बताउने १३ कम्पनीहरुले यसको मुख्य कारणमा सामाग्रीको बढ्दो लागत, उपभोक्ता खर्चमा भइरहेको सुस्त वृद्धि र कोभिड–१९ को संक्रमण बल्झिनु आदि बताएका छन् । सर्वेक्षणमा टोयोटा मोटर कर्पोरेशन र सफ्ट बैंक कर्पोरेशन, आना होल्डिङ्स, सेभेन एन्ड आई होल्डिङ्स र पानासोनिक कर्पोरेशनलगायत देशका १०६ओटा ठूला कम्पनीहरु समाविष्ट थिए । एजेन्सी