चैत ३०, काठमाडौं । प्रभु इन्स्योरेन्स लिमिटेडको २६ औं वार्षिक साधारण सभा बुधवार सम्पन्न भएको छ ।
भर्चुअल रुपबाट आयोजित सभाले कम्पनीले प्रस्ताव गरेको ११ प्रतिशत बोनश शेयर तथा बोनश शेयरमा लाग्ने कर बापत शून्य दशमलव ५८ प्रतिशत नगद लाभांश गरि जम्मा ११ दशमलव ५८ प्रतिशत लाभांश पारित गरेको छ ।
वार्षिक साधारण सभामा वार्षिक प्रतिवेदन प्रस्तुत गर्दै कम्पनीका अध्यक्ष कुसुम लामाले बीमा क्षेत्रमा रहेको तीब्र प्रतिस्पर्धाका बीच पूँजी, दावी भुक्तानी, व्यवस्थापन खर्च र व्यवसाय विस्तारलाई समुचित व्यवस्थापन गरी दिगो तथा सुरक्षित दीर्घकालिन लक्ष्य प्राप्तिका लागि प्रयत्नशील रहेको बताए ।
हाल सञ्चालनमा रहेका २० ओटा निर्जीवन बीमा कम्पनीहरुको बजार, ग्राहक, लक्ष्य, उद्देश्य लगभग एकै किसिमका रहेकाले यस्तो अवस्थामा कम्पनीले प्रतिस्पर्धा गर्न ग्राहक केन्द्रित भएर आकर्षक बीमा सेवा प्रदान गर्दै अगाडि बढेको पनि उनले बताए ।
सभाले बीमा समितिबाट जारी भएको पूँजी वृद्धि सम्वन्धी निर्देशन बमोजिम कम्पनीको चुक्तापूँजी २ अर्ब ५० करोड पुर्याउनको लागि हकप्रद शेयर जारी गरि पूँजी वृद्धि गर्ने बिशेष प्रस्ताव पनि पारित गरेको छ । साथै सभाले कम्पनीको पूँजी वृद्धि सम्वन्धी योजना तयार गरि बीमा समितिमा पेश गर्न साधारण सभाले सञ्चालक समितिलाई अख्तियारी पनि दिएको छ ।
वार्षिक साधारण सभाबाट पारित बोनश शेयर बितरणपछि कम्पनीको चुक्तापूँजी १ अर्ब २८ करोड ९७ लाख ११ हजार रुपैयाँ पुगेको छ । कम्पनीले केन्द्रीय कार्यालयसहित ५५ भन्दा बढी शाखा तथा उपशाखाहरुबाट सेवा प्रदान गरिरहेको कम्पनी सचिव अरबिन्द कुमार कर्णले सो अवसरमा जानकारी दिए ।
