पुस १५, काठमाडौं । सरकारले नेपाल धितोपत्र बोर्ड (सेबोन) को अध्यक्ष पदको नियुक्ति प्रक्रिया पुन : शुरु गर्ने तयारी गरेको छ ।
अर्थ मन्त्रालयले बिहीवार सूचना प्रकाशित गर्दै सेबोनको अध्यक्ष पदका लागि पुनः दरखास्त आह्वान गरेको हो । अध्यक्षको नियुक्तिका लागि गठित छनोट तथा सिफारिस समितिले पुनः दरखास्त आह्वान गरेको हो। योसँगै यसअघि खुलाइएको दरखास्त र परेका आवेदन भने स्वतः खारेज भएको छ । लामो समयदेखि रिक्त रहेको धितोपत्र बोर्डको अध्यक्ष पदमा नियुक्तिका लागि अर्थ मन्त्रालय र सिफारिस समिति बीच विवाद भएपछि पुन : नियुक्ति प्रक्रिया शुरु गरिएको हो ।
यसअघि अर्थ मन्त्रालयले सेबोनमा अध्यक्ष नियुक्तिका लागि नाम सिफारिस गर्न राष्ट्रिय योजना आयोगका उपाध्यक्ष डा विश्व पोडेल, अर्थ सचिव मधुकुमार मरासिनी र विज्ञ सदस्यका रुपमा प्राडा नारायणप्रसाद पौडेल सम्मिलित सिफारिस समिति गठन गरेको थियो। तर, धितोपत्रसम्बन्धी ऐनमा छनोट समिति सरकारले बनाउनुपर्ने उल्लेख छ। सोही कारण अर्थ मन्त्रालयले बनाएको र मन्त्रीस्तरीय निर्णयलाई नेपाल सरकारको निर्णय भन्न नमिल्ने भन्दै शुरुदेखि समिति गठनका विषयमा विवाद हुँदै आएको थियो।
सरकारले अहिले पुनः डा विश्व पौडेलकै संयोजकत्वमा तीन सदस्यीय समिति गठन गरेको छ। सोही समितिले पुनः दरखास्त आह्वान गरेको छ। यसअघि गत कात्तिक १५ गते धितोपत्र बोर्डको अध्यक्ष पदमा दरखास्त आह्वान गरिएको थियो । उक्त समयमा १२ जनाले दरखास्त दिएका थिए । ती आवेदकलाई पनि पुनः दरखास्त पेस गर्न आग्रह गरिएको छ। यदि आवेदन फिर्ता लिन चाहेमा १५ दिनभित्र लिन सक्ने पनि सूचनामा उल्लेख छ।
पुनः गरिएको सूचनाको मितिले १५ दिनभित्र अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामा गोप्य शिलबन्दी आवेदन दिन भनिएको छ।
इच्छुक उम्मेदवारले अर्थ मन्त्रालयको वेबसाइटमा प्रकाशित अध्यक्षको छनोट तथा सिफारिसम्बन्धी कार्यविधिको दफा ३ बमोजिमको कागजात तथा विवरण र दफा ४ अनुसारको स्वयं घोषणाको व्यहोरा निवेदन स्वयंले प्रमाणित गरी पेस गर्नुपर्नेछ।
आवेदन दिंदा व्यावसायिक कार्ययोजना (५ हजार शब्दमा नबढ्ने गरी) खामबन्दी गरी पेस गर्नुपर्नेछ। गत असोज १९ गते बसेको मन्त्रिपरिषद्को बैठकले सेबोनका तत्कालीन अध्यक्ष भीष्मराज ढुंगानालाई बर्खास्त गर्ने निर्णय गरेको थियो।
बर्खास्तीमा परेका ढुंगानाले भने पुनर्बहालीको माग गर्दै सर्वोच्च अदालतमा रिट दायर गरेका छन्। उनको रिटमा सुनुवाइ भने भइसकेको छैन ।
यो पनि हेर्नुस् :
नेपाल धितोपत्र बोर्डको अध्यक्ष पदका लागि १२ जनाले दिए आवेदन
अन्तत: नेपाल धितोपत्र बोर्डका अध्यक्ष भीष्मराज ढुंगाना बर्खास्त
