माघ २७, धरान । धरान स्थित वीपी कोइराला स्वास्थ्य विज्ञान प्रतिष्ठानको आर्थिक कारोबार ठप्प हुँदा दैनिक प्रशासनिक काम सहित अस्पतालको सेवा समेत प्रभावित भएको छ ।
स्वास्थ्य मन्त्रालयले प्रतिष्ठानका वहालवाला पदाधिकारीहरुलाई काम रोकेर मन्त्रालय र महालेखाबाट कर्मचारी पठाउने निर्णय गरे यता आर्थिक कारोबार ठप्प भएको छ । सरकारले पठाएका कर्मचारीलाई प्रतिष्ठानको ऐन, नियमावलीले आर्थिक कारोबार गर्ने अधिकार नदिएकाले समस्या भएको छ ।
आर्थिक कारोबार नहुँदा स्पाइनल, मुटु, क्यान्सरलगायतको उपचारमा बिरामीले १ लाखसम्मको उपचार खर्च अन्तर्गतको औषधी किनेर सोधभर्ना पाउनुपर्ने रकम बिरामीले पाउन सकेका छैनन् । यस्ता बिरामीहरुले प्रतिष्ठानमा नभएको औषधी बाहिर मेडिकलमा किन्ने र बिल बुझाएर सोधभर्ना लिने गरेका थिए ।
यस्तै, ल्याबमा चाहिने रि एजेण्टसहितका सामग्री, एक्सरेको आवश्यक सामग्रीहरु पनि खरीद आदेश गर्न नपाएर समस्या हुँदै गएको छ । अक्सिजनको साना सिलिण्डर बाहिर भरेर ल्याउन नपाउँदा पनि समस्या बढ्दै गएको छ भने बिरामीहरुलाई खुवाउने खानाको सामग्री, बिग्रिएको सामान मर्मत गर्ने लगायतका कामहरु ठप्प छन् ।
आर्थिक प्रशासनको काम रोकिएको जस्तो देखिएपनि समग्रमा अस्पताल सेवालाई नै प्रभावित बनाइरहेको खरीद शाखा प्रमुख सागर ताम्राकारले बताए ।
खरीद शाखाका अनुसार प्रतिष्ठानले वर्षभरि आवश्यक पर्ने सामानको टेण्डर गरेको हुन्छ । टेण्डर अनुसारको सामान एकैपटक भने ल्याएर राखिएको हुँदैन । म्याद गुज्रिने, सामान राख्न ठाउँ अभाव हुने, एकै पटक धेरै रकम भुक्तानी गर्नुपर्ने लगायत समस्याले गर्दा टेण्डरपछि सम्झौता गरेर ३÷४ महीनामा खरीद आदेश मार्फत ती सामान ल्याउने गरिएको हुन्छ ।
अहिले पदाधिकारीहरु नभएकोले खरीद आदेश स्वीकृत गर्न नसक्दा अस्पताल सेवा प्रभावित हुने गरी समस्या शुरु भएको हो । कतिपय अत्यावश्यक सामानहरु कर्मचारीहरुले आफैले भविष्यमा भुक्तानी हुन्छ भन्दै आपूर्ति गरिरहेका छन् ।
पदाधिकारीलाई सरकारले काम गर्न रोकेको र आर्थिक अधिकार सहित प्रशासन सम्हाल्न आएका डा. श्याम सुन्दर यादवले पनि काम गर्ने अवस्था नभएपछि सबै कारोबार ठप्प भएको कर्मचारीको भनाइ छ ।
मन्त्रिपरिषद् बैठकले गत पुस ३० गते निर्णय गर्दै माघ ६ गते डा.श्यामसुन्दर यादव सहित महालेखाबाट कोष तथा लेखा नियन्त्रक कार्यालय सुनसरीका प्रमुख चिरञ्जिवि अधिकारीलाई पठाएको थियो । त्यसयता प्रतिष्ठानको आर्थिक कारोबार पूर्णरुपमा ठप्प छ ।
प्रतिष्ठानको ऐन र नियमावली अध्ययनपछि सरकारले पठाएका डा.श्यामसुन्दर यादव पनि आफू अधिकारविहिन अवस्थामा रहेको भन्दै फर्किएका छन् । प्रतिष्ठानमा आर्थिक कारोबार गर्न नसक्ने अवस्था भएपछि यादव काठमाडौं फर्किएका हुन् ।
सरकारले उनलाई प्रशासनिक र आर्थिक अधिकारसमेत दिएर प्रतिष्ठान पठाएको थियो । तर, प्रतिष्ठानको ऐन, नियमावलीले उपकुलपतिलाई मात्र आर्थिक अधिकार दिएको र सरकारले पठाएका कर्मचारीलाई त्यस्तो अधिकार नभएको भन्दै प्रतिष्ठानका कर्मचारीहरुले तत्कालको अवस्थामा उनलाई सहयोग गर्न नसक्ने बताएपछि उनी काठमाडौं फर्किएका हुन् ।
