वैशाख १४, काठमाडौं । बैंक अफ काठमाण्डूको स्वामित्वमा रहेको आरएमडीसी लघुवित्त वित्तीय संस्था र छिमेक लघुवित्त वित्तीय संस्थाको संस्थापक शेयर आज (मंगलवार) देखि लिलामीमा विक्री खुला हुने भएको छ ।
कम्पनीले आरएमडीसी लघुवित्तको १ लाख ४९ हजार ८०० कित्ता र छिमेक लघुवित्तको २ लाख कित्ता संस्थापक शेयर लिलामीमा विक्री खुला गरेको हो ।
यी दुवै कम्पनीको शेयर गत माघ २७ देखि चैत ३ गतेसम्म बोलपत्र आव्हान गर्दा विक्री भएपश्चात बाँकी रहेको शेयर पुनः लिलामीमा विक्री गर्न लागिएको हो ।
उक्त शेयर खरीद गर्न इच्छुक विद्यमान संस्थापक वा व्यक्ति, कम्पनी तथा संस्थाले कम्पनीले वैशाख २१ गतेसम्म बोलपत्र पेश गर्न सक्नेछन् ।
आरएमडीसी लघुवित्तको न्यूनतम मूल्य रू. ४३५ र छिमेक लघुवित्त न्यूनतम मूल्य रू. ६०० तोकिएको छ । आवेदकले तोकिएको मूल्य वा सोभन्दा बढी मूल्य अंकित गरी बोलकबोल गर्नु पर्ने हुन्छ ।
दुवै शेयर खरीदका लागि बोलकबोल गर्दा न्यूनतम १ हजार कित्तादेखि अधिकतम सम्पूर्ण कित्तासम्म माग गर्न सकिने व्यवस्था छ ।
कम्पनीको शेयर विक्री प्रबन्धकमा बिओके क्यापिटल लिमिटेड रहेको छ ।
