मलेसिया सरकारले विगतमा विदेशबाट कामदार झिकाउँदा पहिलो प्राथमिकतामा नेपालीलाई राख्ने गरेको थियो । तर, अब उसले नेपाली कामदारलाई कम महत्त्व दिने भएको छ । यसबाट नेपाली कामदारको प्रमुख गन्तव्य बन्दै आएको मलेसियाबाट प्राप्त हुने विप्रेषणमा ठूलो कमी आउने सम्भावना बढेको छ । यसमा नेपाली कामदारको उच्छृंखल गतिविधि दोषी रहेको वैदेशिक रोजगार व्यवसायीहरूले बताएका छन् । हाल मलेसियाले नेपाली कामदारको माग गर्न छाड्नुले नेपाली कामदारप्रति उनीहरूको दृष्टिकोण क्रमशः नकारात्मक हुँदै गएको बुझ्न सकिन्छ । ६ महिनाअघि २ हजार नेपाली कामदार लिने भनेको बहुराष्ट्रिय कम्पनी सोनीको मलेसियािस्थत कार्यालयले ५ सय जनाको मात्र माग पठाएकाले यसको पुष्टि हुन्छ ।
गत आर्थिक वर्षमा वैदेशिक रोजगारीमा गएका कुल कामदारमध्ये ३८ प्रतिशत अर्थात् १४ हजार कामदार मलेसिया गएका थिए । अहिले त्यहाँका कतिपय रोजगारदाता कम्पनीले नेपालबाट कामदार माग गर्न नै छाडिसकेको बताइएको छ । यसबाट विप्रेषणमा टिकेको नेपालको अर्थतन्त्रमा ठूलो असर पर्ने देखिन्छ । गत आवमा विभिन्न मुलुकमा गएका नेपाली कामदारबाट प्राप्त विप्रेषणमध्ये ४९ प्रतिशत मलेसियाबाट आएको थियो ।
उसै पनि राजनीतिमा हदभन्दा बढी अभिरुचि भएका नेपालीहरू अर्काको मुलुकमा गएर पनि विभिन्न संघसंस्था खोल्न भ्याएका छन् । ती संस्थाहरूले कामदारको हकका नाममा गर्ने कतिपय क्रियाकलापहरू उच्छृंखल देखिँदै आएका छन् ।
वर्ष ६, अंक ३४, सोमवार, २५ असोज २०६७