वैशाख १३, काठमाडौं। नेपाल राष्ट्र बैंकका गभर्नर महाप्रसाद अधिकारीले दायर गरेको रिटमा मंगलवार छलफल हुँदैछ ।
सर्वोच्च अदालतको एकल इजलासबाट अल्पकालिन अन्तरिम आदेशमार्फत पुनर्स्थापित भएका गभर्नर अधिकारीको रिट न्यायाधीश सपना प्रधान मल्ल र टंकबहादुर मोक्तानको संयुक्त इजलासमा पुगेको छ। दुवै पक्षसँगको छलफलपछि सर्वोच्चले अल्पकालीन अन्तरिम आदेशलाई निरन्तरता दिनेरनदिने निर्णय गर्नेछ ।
अल्पकालीन अन्तरिम आदेशलाई निरन्तरता दिए अर्थमन्त्री जनार्दन शर्मा प्रभाकर नैतिक संकटमा पर्नेछन् भने अल्पकालीन अन्तरिम आदेशलाई निरन्तरता दिनु नपर्ने आदेश भएमा गभर्नर अधिकारी घर जानुपर्नेछ ।
अघिल्लो पटक हरिप्रसाद फुँयालको एकल इजलासले गभर्नर अधिकारीलाई अल्पकालिन अन्तरिम आदेश दिंदै दुबै पक्षलाई वैशाख १३ गते मंगलवार बोलाउने निर्णय गरेको थियो।
साथै सर्वोच्चले विपक्षीका नाममा कारण देखाऊ आदेश जारी गर्नुका साथै अन्तरिम आदेश जारी गर्ने/ नगर्ने विषयमा छलफल गर्न पेशी तोकेको थियो ।
गत चैत २५ गतेबाट निलम्बित भएका गभर्नर अधिकारी ११ दिनपछि राष्ट्र बैंकमा अदालतको फैसलापछि हाजिर भएका थिए।
