काठमाडौं (अस) । लुनकरणदास–गंगादेवी चौधरी साहित्यकला मन्दिरले तीन स्रष्टालाई सम्मान गरेको छ । संस्था स्थापनाको २८औं वर्ष प्रवेशको अवसरमा मंगलवार स्रष्टाहरूलाई सम्मान गरिएको हो ।
लुनकरणदास–गंगादेवी चौधरी साहित्यकला मन्दिरले स्थापना गरेको ‘इतिहास शिरोमणि बाबुराम आचार्य शोधसम्मान’ स्रष्टा प्रा.डा. त्रिरत्न मानन्धर, ‘सरस्वती सम्मान’ तेजेश्वर बाबु ग्वंगः र ‘नारायणगोपाल संगीत सम्मान’ न्हूँछेबहादुर डंगोललाई प्रदान गरिएको छ । सम्मानित तीन स्रष्टा ज्येष्ठ नागरिक समेत हुन् ।
समारोहमा प्रा.डा. उषा ठाकुर र साहित्यकला मन्दिरका अध्यक्ष वसन्त चौधरीले संयुक्त रूपमा तीन स्रष्टाहरूलाई नगद जनही १ लाख ५१ हजार र सम्मानपत्रसहित दोसल्ला ओढाएर सम्मान गरेका थिए । संस्थाले स्थापनाको वर्षदेखि नै विभिन्न विधाका स्रष्टाहरूलाई सम्मान गर्दै आएको छ । हालसम्म संस्थाबाट १०० भन्दा बढी स्रष्टाले सम्मान पाएका छन् ।
