सुनसरी । कृषि क्षेत्रको प्रवद्र्धन तथा कृषिमा स्थानीयलाई प्रोत्साहन गर्न सुनसरीको बराहक्षेत्र नगरपालिकाले आफ्नो निति तथा कार्यक्रम पनि कृषिमैत्री बनाएको छ ।
बराहक्षेत्र नगरपालिकाले विभिन्न अनुसन्धानका लागि कृषि ल्याब स्थापना गर्नुका साथै कृषकका लागि आवश्यक सामग्रीसमेत वितरण गर्दै आएको छ ।
स्थानीय तहमै पहिलो पटक बराहक्षेत्र नगरपालिकाले रोग, किरा र बालीको अध्ययन अनुसन्धानका लागि कृषि ल्याब स्थापना गरेको छ ।
नगरपालिका परिसरमा निर्माण गरिएको ल्याब सञ्चालनका लागि तयारी अवस्थामा छ । संघीय र प्रदेश स्तरमा मात्र कृषि ल्याब रहेकामा बराहक्षेत्र नगरपालिकाले स्थानीय तहमा मुलुकमै पहिलो पटक ल्याब सञ्चालन गर्न लागेको कृषि प्राविधिक निरबहादुर राईले जानकारी दिए ।
चालू आर्थिक वर्षमा बराहक्षेत्र नगरपालिकाले बाली विकास तथा जैविक विविधता संरक्षण केन्द्रको ससर्त अनुदानमा मकै प्रवद्र्धन कार्यक्रममार्फत १० हजार केजी मकैको बिउ वितरण गरेको छ ।
टीएक्स ३ सय ६९ जातको हाइब्रिड मकैको बिउ ४ सय ७६ हेक्टरका लागि वितरण गरिएको छ । ८० कृषकलाई ५० प्रतिशत अनुदानमा मकै छोडाउने मेसिन प्रदान गरिएको छ ।
बराहक्षेत्र नगरपालिकाले धान प्रवद्र्धन कार्यक्रममार्फत चैते धान हडिनाथ–३ जातको बिउ २३ हेक्टरका लागि निःशुल्क वितरण गरी क्षेत्र विस्तार गरिएको नगर कृषि शाखा प्रमुख तुलसा लिम्बूले बताइन् ।
उन्नत धानको बिउ अनुदान कार्यक्रमअन्तर्गत ५० प्रतिशत अनुदानमा वर्षे धानको विभिन्न १२ जातको बिउ १७ हजार ६ सय केजी वितरण गरिएको छ ।
यसैगरी धान प्रवर्द्धन कार्यक्रममार्फत २० लाख रुपैयाँ बराबरको ३ थान रिपर र १ थान कम्बाइट हार्भेस्टर वितरण गरिएको छ । कृषिमा प्रदेश साझेदारी कार्यक्रमअन्तर्गत ७० मेट्रिक टन क्षमताको मिनी कोल्ड स्टोर निर्माण गरिएको छ ।
भूमि व्यवस्था, कृषि तथा सहकारी मन्त्रालय विराटनगरको ७५ प्रतिशत र नगरपालिकाको २५ प्रतिशत साझेदारीमा ६८ लाख रुपैयाँमा कोल्ड स्टोर निर्माण भई सञ्चालमा आएको छ ।
यस्तै, मन्त्रालयकै ५० प्रतिशत साझेदारीमा बांगे बजार व्यवस्थापन कृषि टहरा ६० लाखको लागतमा निर्माण गरिएको छ । मन्त्रालयकै साझेदारीमा बराहक्षेत्र ९ ढोलबजियामा रहेको सुन्दर कृषि फार्मको २५ प्रतिशत लगानीमा ४० मेट्रिक टन क्षमताको कोल्डस्टोर निर्माण गरिएको छ ।
भूमि व्यवस्था, कृषि तथा सहकारी मन्त्रालयकै ५० प्रतिशत अनुदानमा अभियानमुखी कृषि फार्म बराहक्षेत्र १० मा ६० लाखको लागतमा गोदाम घर निर्माण भएको छ ।
नगरपालिकाबाट विनियोजित बजेटमार्फत कृषकलाई ८६ थान साना सिँचाइ विद्युतीय मोटर ५० प्रतिशत अनुदानमा वितरण गर्ने तयारी गरिएको कृषि प्राविधिक निरबहादुर राईले बताए ।
नगरमा ३ थान बोरिङ र एउटा डिप ट्युबवेल निर्माण गरिएको प्राविधिक राईको भनाइ छ ।
उनका अनुसार नगरको कृषि शाखाले विभिन्न जातका तरकारीका बिउ १२ हजार ८ सय प्याकेट वितरण गरेको छ । हिउँदे मिनी किट ३५ सय प्याकेट वितरण गरेको छ ।
आकस्मिक बाली संरक्षण कार्यक्रममार्फत ५ लाख बराबरको विषादी वितरण गरिएको छ । कृषि शाखाका अनुसार नगरले आइपीएम कृषक पाठशाला सञ्चालनमा ल्याएको छ । माटो शिविर, कृषि ल्याबका सामग्री खरिद र स्थलगत तालिम ११ वटा विभिन्न वडामा सम्पन्न गरिएको छ । यसमा ३ सय जना कृषक सहभागी भएका छन् ।
नगरले ५० प्रतिशत अनुदानमा स्पेयर ट्यांकी वितरण गरेको छ । प्राविधिक राईका अनुसार नगरपालिकाले कृषक परिचयपत्रका लागि सप्mटवेयर खरिद गरी उत्पादन नियन्त्रण प्रणालीअन्तर्गत कृषकको विवरण दर्ता गरिएको छ ।
हाल सफ्टवेयरमा ८ सय ३६ जना कृषकले विवरण दर्ता गराएका छन् । यसैगरी पकेट विकास कार्यक्रमअन्तर्गत ससर्त अनुदानमा ४ वटा च्याउ पकेट क्षेत्र र एउटा तरकारी पकेट क्षेत्र सञ्चालनमा रहेको कृषि शाखा प्रमुख तुलसा लिम्बूले बताइन् । रासस
