पुस १३, काठमाडौं । साताको तेस्रो कारोबार दिन मंगलवार नेप्से परिसूचक अघिल्लो कारोबार दिनको तुलनामा २ दशमलव ६६ अंकले घटेको छ ।
यो दिन नेप्से परिसूचक २५१८ दशलमव ९९ विन्दुमा रहेको हो । यो दिन कारोबारमा आएका २३० ओटा धितोपत्रको ५८ लाख २८ हजार ७८३ कित्ता शेयर रू. ३ अर्ब १२ करोड ५५ लाख ७५ हजार ६३१ मा खरीदविक्री भएको छ ।
यो दिन कारोबारमा आएका ती धितोपत्रमध्ये मध्य भोटेकोशी जलविद्युत् कम्पनीको शेयरमा सकारात्मक सर्किट लागेको छ । कम्पनीको शेयरमूल्य अघिल्लो कारोबार दिनको तुलनामा यो दिन १० प्रतिशतले वृद्धि भएसँगै सकारात्मक सर्किट लागेको हो ।
कम्पनीको शेयरमूल्य प्रतिकित्ता रू. १३३ दशमलव १० पुगेको छ । त्यसैगरी दोस्रोमा नेपाल हाइड्रो डेभलोपरको शेयर मूल्य ५ दशमलव ३६ प्रतिशतले वृद्धि भएर रू.३८५ पुगेको हो ।
यो दिन सबैभन्दा बढी गोर्खाज फाइनान्सको शेयरमूल्य ९ दशमलव ९९ प्रतिशत घटेको छ । कम्पनीको शेयरमूल्य प्रतिकित्ता रू. ७८९ दशमलव १० मा झरेको हो ।
त्यसैगरी दोस्रोमा सामलिङ पावर कम्पनीको शेयर मूल्य अघिल्लो दिनको तुलनामा ६ दशमलव शून्य ४ प्रतिशत घटेर रू. ४६७ मा झरेको छ । यो दिन सर्वाधिक शेयर खरीदविक्री हिमालयन डिष्टिलरीको रू.२६ करोड ३९ लाख ४३ हजार बराबरको भएको हो ।
कम्पनीको शेयरमूल्य प्रतिकित्ता रू. ६ हजार ९१८ कायम भएको छ । कम्पनीको साधारण सभा र लाभांश प्रयोजनको लागि तोकिएको बुक क्लोजको मिति नजिकिएकाले पनि सर्वाधिक शेयर खरीदविक्री भएको हो ।
कम्पनीले साधारण सभा प्रयोजनको लागि पुस १६ गते बुक क्लोज गरेकाले पुस १५ गतेसम्म कायम शेयरधनीले साधारण सभामा भाग लिन र लाभांश पाउनेछन् । कम्पनीले गत आवको मुनाफाबाट शेयरधनीलाई ७५ प्रतिशत बोनस शेयर र २५ प्रतिशत नगद लाभांश (करसमेत) वितरण गर्ने प्रस्ताव गरेको छ । उक्त प्रस्ताव पारित गर्नका लागि कम्पनीले पुस २८ गते साधारण सभा बोलाएको छ ।
त्यसैगरी यो दिन दोस्रोमा नबिल बैंकको रू. २५ करोड ३७ लाख ३७ हजार बराबरको शेयर खरीदविक्री भएको छ । कारोबारमा आएका १३ ओटा समूहमध्ये ६ ओटा समूहको परिसूचक बढेको छ भने बाँकी समूहको परिसूचक घटेको छ ।
यो दिन समूहगत परिसूचक बढ्नेमा उत्पादन तथा प्रशोधन समूहको परिसुचक २ दशमलव शून्य ७ प्रतिशतले बढेको छ । त्यसैगरी व्यापार समूहको शून्य दशमलव ६४ प्रतिशत,विकास बैंक समूहको शून्य दशमलव ११ प्रतिशत,हाइड्रोपावर समूहको शून्य दशमलव ९१ प्रतिशत,वित्त समूहको शून्य दशमलव ७२ प्रतिशत र अन्य समूहको परिसुचक शून्य दशलमव १७ प्रतिशतले वृद्धि भएको छ ।
त्यसैगरी बैंकिङ समूहको परिसूचक शून्य दशलमव ५१ प्रतिशत,होटल एण्ड टुरिजम समूहको शून्य दशमलव ३५ प्रतिशत,निर्जीवन बीमा समूहको शून्य दशमलव ३१ प्रतिशत,लघुवित्त समूहको शून्य दशमलव ५४ प्रतिशत,जीवन बीमा समूहको शून्य दशमलव २७ प्रतिशत,म्युचुअल फण्ड समूहको शून्य दशमलव ४६ प्रतिशत र लगानी समूहको परिसुचक शून्य दशलमव ४७ प्रतिशतले घटेको छ ।
पुस महीना लागेपछि बजारले सकारात्मक गति लिएको छ । केही दिन बढेको बजारमा अल्पकालिन लगानीकर्ताले नाफा बुक गरेसँगै सामान्य करेक्सन आएको छ । शेयर बजार भनेकै घटबढ भइरहन्छ । करेक्सन हुँदै अगाडि बढेको बजार बलियो हुने पनि अनुमान बजार विश्लेषकहरुले गरेका छन् ।
