पुस २०, काठमाडौं । बीमाको दररेट र शर्तहरु संशोधन सम्बन्धमा नेपाल निर्माण व्यवसायी महासंघ र स्वतन्त्र उर्जा उत्पादकहरूको संस्था नेपाल (ईप्पान) को संयुक्त प्रतिनिधिमण्डल र बीमा समिति बीच मंगलवार भएको वार्ता बिना निष्कर्ष सकिएको छ ।
बीमा समितिका कार्यकारी निर्देशक राजुरमण पौडेलसँगको भेटमा समितिले समस्या समाधानका लागि ठोस प्रस्ताव नल्याएको महासंघले बतााएको छ ।
गत असोज ६ मा जारी पुनर्बीमा निर्देशिका, २०७८ मा बीमाको दररेट र शर्तहरु हालसम्म संशोधन नभएकोले त्यस्तो अव्यवहारिक निर्देशिका खारेज गर्न महासंघ र ईप्पानले माग राखेका छन् । यस सम्बन्धमा महासंघ र ईप्पानले बीमा समितिलाई दुईपटक र प्रधानमन्त्रीलाई समेत संयुक्त रूपमा ज्ञापनपत्र बुझाएको थियो ।
उक्त ज्ञापनपत्र बुझाए पश्चात् बीमा समितिले महासंघ र ईप्पानलाई मंगलवार वार्तामा बोलाउँदा बीमा समितिले कुनै निकास नदिएकोले निर्देशिका खारेज नभएमा ईप्पान र निर्माण महासंघले संयुक्त रुपले चरणबद्ध आन्दोलन गर्ने पनि बताएका छन् ।
निर्देशिका खारेज नभएसम्म बीमा समितिसँग कुनै पनि वार्ता तथा छलफल नगर्ने निर्णय महासंघ र ईप्पानले गरेको छ । निर्देशिका खारेज भएपछि सर्वपक्षीय सरोकारवालानिकायहरू बीच विस्तृत छलफल हुनुपर्ने महासंघको माग रहेको छ ।
विदेशी बीमा कम्पनीसँग समेत बीमा गर्ने व्यवस्था हुनुपर्ने, बीमा गर्ने कार्य ऐच्छिक हुनुपर्ने, बीमा गरेको मितिदेखि नै क्षतिपूर्ति पाउनु पर्ने, खुला अर्थबजार नीतिअनुरुप स्वस्थ प्रतिस्पर्धा गरिनु पर्ने लगायतका व्यवस्था सहितको निर्देशिका जारी गर्न महासंघका अध्यक्ष रवि सिंहले बीमा समिति समक्ष माग गरेका थिए ।
