जनकपुरधाम। मुस्लिम धर्मावलम्बीको चाड रमजान (ईद उल फित्र)को रौनक शनिवारदेखि सकिएको छ ।
ईदको नमाज पढेपछि शनिवार उक्त पर्व सकिएको हो । मुस्लिम समुदायले एक महीनाको कठोर व्रतपछि ईद पर्व मनाउँछन् । Ramadan 2023 मा व्यापारिक कारोबार समेत बढेको व्यवसायीहरू बताउँछन् । रमजान महीनामा दूध, सबई, खजुर, काजु, किसमिस जस्ता खानेकुरा धेरै विक्री हुने गरेको जनकपुरधाम २५ लोहनाका व्यापारी अहमद हुसैनले बताए ।
रमजानभरि उनले ३ लाख बराबरको ईदका सामग्री विक्री गरेको अनुभव सुनाए । रमजान महीनाभरि प्रायः सबै व्यापारीले राम्रो कमाइ गरेको उनको भनाइ छ ।
रमजान महीनाभरि खसी, कुखराको मासु धेरै नै विक्री हुने गरेको मासु विक्रेता मो. सबीरले जानकारी दिए । रमजान महीनामा २ लाख रुपैयाँ बराबरको मासु विक्री गरेको उनले बताए । रमजान महीनामा लुगाकपडाको विक्री बढेको जनकपुरधामका कपडा व्यापारी प्रमोद साह बताउँछन् ।
उनले रमजान अवधिमा २५ लाख देखि ३० लाख रुपैयाँको कपडाको कारोबार भएको बताए । मुस्लिम समुदायका महिला र युवायुवतीले रमजान महीनामा लुगाकपडा किन्न पसलमा धेरै नै आउने गरेको उनका भनाइ छ । रमजान महीनामा सुनचाँदीको विक्री बढेको जनकपुरधामका सुनचाँदी व्यवसायी दिपेश ठाकुरले बताए ।
