दाङ (अस) । दाङ जिल्ला उद्योग वाणिज्य संघले ‘दाङ औद्योगिक, पर्यटन तथा कृषि प्रदर्शनी २०७८’ सञ्चालन गर्ने भएको छ । संघले आउँदो फागुन २६ देखि चैत ८ गतेसम्म घोराहीमा महोत्सव आयोजना गर्ने भएको हो ।
‘उद्योग व्यापार कृषि एवं पर्यटनको विकास, परनिर्भरमुखी अर्थतन्त्रको निकास’ नारासहित सञ्चालन गरिने महोत्सवले विशेषगरी स्थानीय उत्पादनको पहिचान गर्दै यसलाई प्रवर्द्धन गर्ने महोत्सव मूल आयोजक समिति संयोजक एवं दाङ जिल्ला उद्योग वाणिज्य संघ अध्यक्ष टंकसिंह बुढाथोकीले बताए ।
‘उद्योग वाणिज्य संघले विभिन्न समय यहाँको उद्योग, व्यापार, कृषि एवं पर्यटनलगायत क्षेत्रको प्रवर्द्धनका लागि भूमिका खेल्दै आएको छ’, उनले भने, ‘यसैको निरन्तरतास्वरूप संघले महोत्सव आयोजना गर्दै छ ।’
महोत्सवले स्थानीय स्तरमा उत्पादित वस्तु तथा सेवाको पहिचान गरी बजार प्रवर्द्धन गर्ने अपेक्षा गरिएको छ । महोत्सवले पर्यटन विकास एवं सांस्कृतिक विकासमा महत्वपूर्ण भूमिका निर्वाह गर्ने अध्यक्ष बुढाथोकीको भनाइ छ ।
संघले विभिन्न समिति तथा उपसमिति गठन गरेर महोत्सवको तयारीमा जुटेको जानकारी दिएको छ ।
घोराही उपमहानगर–१४ झिगौंरामा आयोजना गरिने महोत्सवमा औद्योगिक तथा व्यापारिक वस्तुको प्रदर्शनी एवं बिक्री, हस्तकला, कृषि, जडीबुटी तथा पर्यटन एवं सूचना प्रविधिको प्रदर्शनी गरिनेछ । महोत्सवमा लुम्बिनी प्रदेश १२ जिल्लाबाट विभिन्न व्यापारिक स्टल रहनेछन् भने करिब ५ लाख दर्शकले अवलोकन गर्ने र २० करोडको आर्थिक कारोबार गर्ने लक्ष्य राखिएको छ ।
