काठमाडौं । बागमती प्रदेशसभा सदस्य सुरजचन्द्र लामिछानेले काठमाडौं महानगरपालिका वडा नं ३१ अन्तर्गत मदन भण्डारी सडक खण्डको शान्तिनगर क्षेत्रमा आकाशेपुल निर्माणका लागि सडक डिभिजन कार्यालय काठमाडौंका प्रमुखको ध्यानाकर्षण गराएका छन् । लामिछानेले उक्त स्थानमा सयौंको संख्यामा दुर्घटना हुँदा ठूलो मानवीय क्षति भइसकेको र सडक वारपार गर्ने क्रममा धेरै पैदलयात्री मारमा परेको कार्यालय प्रमुखलाई अवगत गराएका छन् ।
स्थानीय व्यक्ति, नागरिक समाज र स्थानीय संघसंस्थाले प्रयागमार्ग र आलोकनगर जोड्ने आकाशेपुलको आवश्यकता औंल्याएको लामिछानेले बताए ।
उक्त स्थानमा आकाशेपुलको आवश्यकतालाई कसैले पनि नकार्न नसक्ने उनको भनाइ छ । उनले कार्यालय प्रमुखलाई बुझाएको ज्ञापनपत्रमा पैदलयात्रीको सुरक्षा संवेदनशीलतालाई ध्यानमा राख्दै यथाशीघ्र योजना अघि बढाउन सम्बन्धित सबै पक्षको ध्यानाकर्षण गराइएको छ । लामिछाने काठमाडौं जिल्ला क्षेत्र नं १ प्रदेश २ बाट निर्वाचित प्रदेशसभा सदस्य हुन् ।
