१७ ओटा विकास बैंकले प्रकाशित गरे चौथो त्रैमासिक वित्तीय विवरण, कुन कम्पनीले कति कमाए नाफा ?

भदौ २, काठमाडौं । १७ ओटा विकास बैंकले अघिल्लो आवको चौथो त्रैमासिक वित्तीय विवरण सार्वजनिक गरेका छन् ।  उक्त वित्तीय विवरण अनुसार १७ ओटा बैंकले कुल रू. ३ अर्ब ९२ करोड ९३ लाख खुद नाफा कमाएका छन् । अघिल्लो आवमा १७ ओटा बैंकले रू. ३ अर्ब ७९ करोड ८९ लाख नाफा कमाएका थिए ।  गत आवको चौथो त्रैमासिक वित्तीय विवरण प्रकाशित गरेका कम्पनीमध्ये नारायणी डेभलपमेण्ट बैंक नोक्सानीमा रहेको छ भने बाँकी सबै कम्पनी नाफामा रहेका छन् । नारायणी डेभलपमेण्ट बैंकले गत आवको चौथो त्रैमासमा रू. १ करोड ८ लाख नोक्सानी व्यहोरेको हो ।  अघिल्लो आवमा कम्पनी रू. ११ लाख ३७ हजार नोक्सानीमा थियो । सबैभन्दा अगाडि मुक्तिनाथ विकास बैंक रहेको छ । बैंकले सबैभन्दा बढी रू. १ अर्ब १५ करोड ९ लाख खुद नाफा आर्जन गरेको हो । अघिल्लो आवको चौथो त्रैमासको तुलनामा खुद नाफा गत आवको सोही अवधिमा ६२ प्रतिशतले वृद्धि भएको हो ।   कम्पनीले अघिल्लो आवको चौथो त्रैमासमा रू. ७० करोड ७४ लाख नाफा कमाएको थियो । त्यस्तै प्रतिशतको आधारमा सबैभन्दा बढी अघिल्लो आवको तुलनामा गत आवमा कर्णाली डेभलपमेण्ट बैंकको खुद नाफा ५५ दशमलव ९ गुणाले वृद्धि भएको छ ।  बैंकले अघिल्लो आवमा रू. ९ लाख  ९ हजार खुद नाफा आर्जन गरेकोमा गत आवमा वृद्धि भएर रू. ५ करोड ८ लाख पुगेको हो । गत आवमा कम्पनीको खुद ब्याज आम्दानी र सञ्चालन नाफामा वृद्धि भएसँगै नाफा वृद्धि भएको हो ।  अघिल्लो आवको तुलनामा गत आवमा तीन ओटा कम्पनीको नाफा घटेको छ । कर्पोरेट डेभलपमेण्ट बैंकको सबैभन्दा बढी ९५ प्रतिशत, मितेरी डेभलपमेण्ट बैंकको १३ दशमलव १५प्रतिशत र ग्रीन डेभलपमेण्ट बैंकको खुद नाफा ८ दशमलव ८८ प्रतिशतका दरले घटेको हो ।  त्यसैगरी, लाभांश क्षमता पनि सबैभन्दा धेरै मुक्तिनाथ विकास बैंकको १७ दशमलव ८८ प्रतिशत रहेको छ । कम्पनीले अघिल्लो आवको मुनाफाबाट शेयरधनीलाई गत आवमा ११ दशमलव २५ प्रतिशत बोनस शेयर र ४ दशमलव २६ प्रतिशत नगद लाभांश वितरण गरेको थियो ।  त्यस्तै, सबैभन्दा कम सिन्धु विकास बैंकको लाभांश क्षमता ३ दशमलव ७४ प्रतिशत रहेको छ । एनएफआरएस प्रणाली अनुसार कम्पनीले आर्जन गरेको खुद मुनाफाबाट विभिन्न शीर्षकमा छुट्याएपछिको नाफा नै वितरणयोग्य नाफा हो । यही वितरणयोग्य नाफा/चुक्तापूँजी×१०० गरेर लाभांश क्षमता निकालिन्छ । कर्पोरेट डेभलपमेण्ट बैंक, कर्णाली डेभलपमेण्ट, सहारा विकास बैंक, नारायणी विकास बैंक र ग्रीन डेभलपमेण्ट बैंकले वितरणयोग्य नाफा उल्लेख नगरेकाले लाभांश क्षमता निकालिएको छैन ।  १७ अ‍ेटा विकास बैंकमध्ये नेपाल स्टक एक्सेचञ्जमा १६ ओटा कम्पनीको शेयर कारोबार हुँदै आएको छ । एक सहारा विकास बैंकको शेयर कारोबार रोक्का रहेको छ । यस बैंकलाई गरिमा विकास बैंकले प्राप्ति गर्ने भएकोेले शेयर कारोबार रोक्का रहेको हो ।                                                                        स्रोत : चौथो त्रैमासिक वित्तीय विवरण