काठमाडौं (अस) । पञ्चकन्या ग्रूपले झापाको दमकस्थित बाल अस्पतालको भवन निर्माणका लागि आर्थिक सहयोग गर्ने सम्झौता गरेको छ । दमक नगरपालिका–७ मा बाल अस्पतालको भवन निर्माणका लागि पञ्चकन्या ग्रूप र काठमाडौं इन्स्टिच्युट अफ चाइल्ड हेल्थ (केआईओसीएच)बीच सम्झौता भएको हो ।
अस्पतालको ६० लाख मूल्यको एलजीएस स्ट्रक्चरबाट ४ हजार वर्गफिट क्षेत्रफलमा अस्पतालका कोठा तथा भौतिक संरचना निर्माणका लागि सम्झौतापत्रमा हस्ताक्षर गरिएको कम्पनीले जानकारी दिएको छ ।
कम्पनीका अध्यक्ष प्रेमबहादुर श्रेष्ठकी धर्मपत्नी नीलकुमारी श्रेष्ठ केही दिनअघि मात्रै दिवंगत भएकी थिइन् । उनकै स्मृति तथा कम्पनीको औद्योगिक यात्राको ५०औं वर्ष पूरा गरेको अवसरमा उक्त सहयोग गर्न लागिएको बताइएको छ ।
बिहीवार सम्झौतापत्रमा हस्ताक्षर कार्यक्रममा कम्पनीका उपाध्यक्ष ध्रुवकुमार श्रेष्ठले बाल स्वास्थ्यको क्षेत्रमा हातेमालो गर्न पाउनु दुवै संस्थाका लागि गौरव भएको बताए । कम्पनीका प्रबन्ध निर्देशक प्रदीपकुमार श्रेष्ठले उक्त हातेमालोबाट मिल्ने आत्मसन्तुष्टि अमूल्य हुने बताए ।
केआईओसीएचका डा. भगवान कोइरालाले काठमाडौंको जत्तिकै सुविधासम्पन्न बाल अस्पतालको अभाव रहेकाले अस्पताल सञ्चालनमा आएपछि अभाव पूर्ति हुने बताए । कम्पनीले १ महीनाभित्र एलजीएसका संरचना निर्माण गरी अस्पताललाई हस्तान्तरण गर्ने बताइएको छ ।
