बागलुङ । वैदेशिक रोजगारी, वैदेशिक अध्ययन, रोजगारीका समस्या, पुनःस्थापनालगायत विषयमा जानकारी राख्न बागलुङका दुई पालिकाले लगत संकलन थालेका छन् ।
वैदेशिक रोजगारमा रहेका नागरिक र तिनका परिवारको तथ्यांक तथा अवस्था पहिचानका लागि दुई पालिकाले वैदेशिक रोजगारसम्बन्धी पाश्र्वचित्र निर्माण सुरु गरेका हुन् ।
बागलुङ नगरपालिका र काठेखोला गाउँपालिकाले वैदेशिक रोजगारी विवरण संकलन गर्न आप्रवासी ‘प्रोफाइल’ निर्माण थालेका हुन् ।
संकलित तथ्यांक प्रोफाइलका रूपमा राखिने र आगामी नीति तथा कार्यक्रम बनाउँदा त्यसैका आधारमा तयार गरिने बागलुङका नगर प्रमुख जनकराज पौडेलले जानकारी दिए । प्रोफाइलले सुरक्षित प्रवासन नीति र पुनः एकीकरणको लागि समर्थनसहित स्थानीय ‘प्रवास प्रशासन’का लागि उचित योजना, नीति र रणनीतिको विकासमा सहयोग गर्नेछ ।
प्रोफाइल निर्माणका लागि बागलुङ नगरपालिकाले ४ लाख १६ हजार र काठेखोला गाउँपालिकाले ४ लाख ८ हजार रुपैयाँ विनियोजन गरेका छन् । प्रत्येक वडामा एक गणकको व्यवस्थापन गरी क्षेत्रगत तथ्यांक संकलन गरिनेछ ।
नगरपालिकाले १४ र गाउँपालिकाले ८ गणक छनोट गरी तथ्यांक संकलन गर्न थालेका छन् । गणकले कोवो सफ्टवेयरमार्फत तथ्यांक लिनेछन् । बीवाईसी बागलुङको व्यवस्थापनमा गणकलाई सामी हेल्भेटासले दुई दिने सफ्टवेयर सञ्चालनबारे प्राविधिक तालिम दिएर स्थलगत रूपमा तथ्यांक संकलनका लागि वडामा खटाइएटो छ ।
स्थलगत रूपमा खटाइएका २८ गणकले आगामी माघ ४ गतेभित्र आफ्नो जिम्मेवारीमा परेका वडाको वैदेशिक रोजगारीमा गएको, अध्ययनका लागि गएको, वैदेशिक रोजगारीमा आश्रित परिवार, वैदेशिक रोजगारीमा फर्केका, रोजगारीबाट फर्केर पुनःस्थापित भइसकेकाको विवरण संकलन गर्नेछन् ।
प्रोफाइलमा जनसांख्यिकीय जानकारी, प्रमुख गन्तव्य देश, प्रवासी एवं तिनका परिवारको सीप र सूचनामा पहुँचको हालको परिदृश्य, रेमिट्यान्स प्राप्त गर्ने र वित्तीय साक्षरतामा यसको उपयोगिताको प्रवृत्ति तथा ज्ञानस्तरसहितको प्रवास, पुनरागमन प्रवासी कामदारको जानकारी, उनीहरूको अवस्था र पहलमाथि जोड दिने काठेखोलाका अध्यक्ष अमरबहादुर थापाले बताए ।
आप्रवासी पाश्र्वचित्रले राष्ट्रिय सन्दर्भसँग सम्बन्धित स्थानीय स्तरबाट श्रम प्रवासन ढाँचाको समग्र परिदृश्य प्रतिविम्बित गर्ने सुरक्षित आप्रवासन परियोजना (सामी) बागलुङका परियोजना संयोजक मीनप्रसाद उपाध्यायले जानकारी दिए ।
वैदेशिक रोजगारमा ठगी र सम्बन्धित मुद्दा, सामाजिक लागत, चुनौतीलगायतका सुझाव पनि समावेश हुनेछ । रासस
