काठमाडौं (अस) । गत ७ वैशाखदेखि शुरू गरिएको क्यान इन्फोटेक मेला सोमवार सम्पन्न भएको छ । काठमाडौंको भृकुटीमण्डपमा ६ दिनसम्म चलेको ‘आईएमई पे क्यान इन्फोटेक २०२२ इन एशोसिएशन विथ एससीटी स्मार्ट क्यूआर’ सफलतापूर्वक सम्पन्न भएको आयोजक क्यान महासंघले जानकारी दिएको छ ।
सूचना तथा सञ्चार प्रविधि र मनोरञ्जन सम्बन्धी प्रदर्शनी प्रत्येक वर्ष हुँदै आएकोमा गत २ वर्ष कोभिडका कारणले हुन नसकेको आयोजकको भनाइ छ । यसपटकको मेलामा आईसीटी एसेसोरिज र अन्य विभिन्न स्टलहरूमा छूट तथा अफरको व्यवस्था गरिएको थियो ।
वैशाख ७ गते सञ्चार तथा सूचना प्रविधिमन्त्री ज्ञानेन्द्र बहादुर कार्कीले मेलाको उद्घाटन गरेका थिए । मेला अघिल्लो संस्करणको तुलनामा कमले अवलोकन गरेको आयोजकले जानकारी दिएको छ । ‘२ वर्षअघि सम्पन्न क्यान इन्फोटेकको २६औं संस्करण करीब साढे ३ लाख जनाले अवलोकन गरेकोमा यो संस्करणमा करीब सवा २ लाख जना अवलोकनकर्ताले अवलोकन गरेका छन्,’ आयोजकद्वारा जारी विज्ञप्तिमा उल्लेख छ ।
प्रदर्शनीमा नेपाली कलाकारहरूको प्रस्तुति थियो । त्यस्तै प्रशासक तथा पूर्व प्रशासकहरूले पनि मेला अवलोकन गरेको बताइएको छ । आईएमई पे क्यान इन्फोटेक २०२२ इन एशोसिएशन विथ एससीटी स्मार्ट क्यूआरको उत्कृष्ट स्टलको पुरस्कार वल्र्डलिंक कम्युनिकेशन तथा उत्कृष्ट स्टार्टअपको पुरस्कार बीआईसी टेक्नोलोजीले पाएका छन् । उत्कृष्ट स्टलको पुरस्कार राशी ५० हजार रहेको छ । यस्तै उत्कृष्ट स्टार्टअपलाई राष्ट्रिय सूचना प्रविधि दिवसको अवसरमा पुरस्कृत गरिने क्यान महासंघको योजना छ ।
क्यान इन्फोटेक २०२२ मा १७० स्टलहरू विभिन्न खण्डमा रहेका थिए । जसमा ब्रान्डिङ, फिनटेक, स्टार्टअप र इन्नोभेशन, आईसीटी एसेसोरिज तथा प्रडक्ट लञ्चिङ मुख्य खण्ड रहेका थिए । मेलाको शीर्ष प्रायोजक आईएमई पे रहेको थियो । त्यस्तै सह–प्रायोजक एससीटी स्मार्ट क्युआर युनियन पे थियो ।
.jpeg)
.JPG)