दाङमा औद्योगिक, पर्यटन तथा कृषि महोत्सव फागुन २६ गतेदेखि शुरु

फागुन १२, दाङ । दाङ जिल्ला उद्योग वाणिज्य संघले ‘दाङ औद्योगिक, पर्यटन तथा कृषि प्रदर्शनी–२०७८’ महोत्सव गर्ने भएको छ । संघले यही फागुन २६ गतेदेखि चैत्र ८ गतेसम्मका लागि दाङको घोराहीमा महोत्सवको आयोजना गर्ने भएको हो । ‘उद्योग व्यापार कृषि एवं पर्यटनको विकास, परनिर्भरमुखी अर्थतन्त्रको निकास’ मुल नाराका साथ शुरु गरिने महोत्सवले विशेष गरी स्थानीय उत्पादनको पहिचान गर्दै यसलाई प्रवर्द्धन गर्ने महोत्सव मुल आयोजनक समितिका संयोजक एवम् दाङ जिल्ला उद्योग वाणिज्य संघका अध्यक्ष टंकसिंह बुढाथोकीले बताए ।  ‘उद्योग वाणिज्य संघले विभिन्न समयमा यहाँको उद्योग, व्यापार, कृषि एवम् पर्यटनलगायतका क्षत्रको विकास र प्रवर्द्धनका लागि भूमिका खेल्दै आएको छ’, उनले भने, ‘यसैको निरन्तरता स्वरुप संघले महोत्सवको आयोजना गर्दैछ ।’ महोत्सवले स्थानीय स्तरमा उत्पादित वस्तु तथा सेवाको पहिचान गरी वस्तु विकासका साथै बजार प्रवर्द्धन गर्ने अपेक्षा गरिएको छ । साथै यस्ता महोत्सवले पर्यटन विकास एवम् संस्कृतिक विकासमा पनि महत्पवूर्ण भूमिका निर्वाह गर्ने अध्यक्ष बुढाथोकीको भनाइ छ ।  संघले बिहीवार पत्रकार भेटघाट गरी विभिन्न समिति तथा उपसमिति गठन गरेर संघले महोत्सवको तयारीमा जुटेको जानकारी दिएको छ । घोराही उपमहानगरपालीका वडा नं. १४ झिगौंरामा आयोजना गरिने महोत्सवमा औद्योगिक तथा व्यापारीक बस्तुहरुको प्रदर्शनी एवम् विक्री, हस्तकला, कृषि, जडिबुटी तथा पर्यटन सूचना एवम् सूचना प्रविधिको प्रदर्शनी गरिने छ ।  महोत्सवमा लुम्बिनी प्रदेश १२ ओटै जिल्लाबाट विभिन्न व्यापारिक स्टलहरु रहने र करीब ५ लाख दर्शकहरुले अवलोकन गर्ने र २० करोडको आर्थिक कारोबार गर्ने लक्ष्य राखिएको छ ।