विश्व अर्थतन्त्रमा जस्तै नेपालमा पनि कोरोना संक्रमणका कारण आर्थिक गतिविधि शून्यप्रायः भएको छ । यसले पछिल्ला वर्षमा उँभो लागिरहेको हाम्रो अर्थतन्त्रलाई निकै ठूलो झड्का लगाउने पक्का छ । कोभिड–१९ को प्रभाव कहिलेसम्म रहन्छ र कति रहन्छ आकलन गर्न सकिँदैन । कोरोनाकै बीचमा सरकार जेठ १५ गते आउने वर्षका लागि बजेटको तयारीमा छ । संंवेदनशील र विषम परिस्थितिमा आउने बजेटको महत्व अरू बजेटको भन्दा बढी हुन्छ । कोरोनाले पीडित समाजले यो बजेटबाट धेरै आशा गरेको छ, आर्थिक क्षेत्रले झन् बढी । यसर्थ अर्थतन्त्रलाई पुनः चलायमान बनाई आर्थिक वृद्धिको यात्रालाई पुनः जारी राख्नका लागि पनि बजेट महत्वपूर्ण छ । देशको आर्थिक क्षेत्रको इन्जिनलाई बजेटले ल्याउने राजस्व तथा खर्चका नीतिहरूले चलायमान बनाउने हो ।
