अब ट्वीटरको एकाउन्ट भेरिफिकेसन अर्थात् 'ब्लु टिक साइन' पाउँनको लागि पैसा तिर्नु पर्ने भएको छ । यस अघि ब्लु टिक पाउँनको लागि मासिक २० डलर तिर्नु पर्ने चर्चा चलेकोमा ट्वीटरका प्रमुख एलन मस्कले यो रकम मासिक ८ डलर भएको घोषणा गरेका छन् ।उनले यसरि मासिक ८ डलर तिर्नेलाई थप सुविधा हुने पनि बताएका छन् । उनले रकम तिर्ने प्रयोगकर्ताले रिप्लाई, मेन्सन र सर्चमा प्राथमिकता पाउने बताएका छन् । त्यस्तै रकम तिर्ने प्रयोगकर्ताले अरुको भन्दा लामो अडियो तथा भिडियो पोस्ट गर्न सक्ने बताईएको छ । त्यस्तै रकम तिर्ने प्रयोगकर्ताको ट्वीटरमा अन्य प्रयोगकर्ताको तुलनामा आधा मात्र विज्ञापन देखिने मस्कले बताएका छन् । राजनीतिक दलका नेताको एकाउन्टमा भने उनीहरुको परिचय दिनको लागि छुट्टै ट्याग हुने मस्क्ले उल्लेख गरेका छन् । जुन ब्यबस्था अहिले पनि कायम छ ।एलन मस्कले ट्वीटर खरिद गरेसँगै उनले ट्वीटरका कर्मचारीहरुलाई आगामी नोभेम्बर ७ सम्ममा भेरिफिकेसन अर्थात् 'ब्लु टिक साइन' पाउँनको लागि पैसा तिर्नु पर्ने ब्यबस्था कार्यान्वयन गर्न निर्देशन दिएका थिए । यदी उनीहरुले नोभेम्बर ७ सम्ममा यो काम गर्न नसकेमा मस्कले ति कर्मचारीलाई बर्खास्त गर्ने तयारी गरेको 'द भर्ज'ले जनाएको थियो ।एलन मस्कले ट्वीटर खरिद गरेपछि त्यहाँका सीइओ सहित उच्च तहका कर्मचारीहरुलाई बर्खास्त गरिसकेका छन् । त्यस्तै उनले अब डेडलाइन तोकेर काम दिने र सो समयमा ति कार्य पुरा गर्न नक्सने कर्मचारीलाई पनि बर्खास्त गर्ने चेतावनी दिएका छन् । मस्कले हाल लगइन नगर्दा देखिने ट्वीटरको होम पेजको इन्टरफेस परिवर्तन गरिसकेका छन् । उनले टेस्लाका इन्जिनियरलाई ट्वीटरको सल्लाहकारको रुपमा ल्याएर यो काम गरेको बताईएको छ ।
