हेटौंडा । उद्योग संघ मकवानपुरले हेटौंडा अस्पतालमा निर्माण गरेको अक्सिजन जेनेरेटर प्लान्ट सञ्चालनमा आएको छ दैनिक १२० सिलिन्डर ग्यास उत्पादन गर्न सक्ने क्षमताको प्लान्टको बागमती प्रदेशका मुख्यमन्त्री डोरमणि पौडेलले आइतवार उद्घाटन गरे ।
मुख्यमन्त्री पौडेलले प्रदेश मातहत आएपछि अस्पताललाई व्यापक सुधार गरिएको बताए । ५० शय्याको अस्पताललाई ३०० शøयाको बनाएको र अब चाँडै ५०० शय्याको बनाइने उनले जानकारी दिए । तीन मात्रै चिकित्सक रहने अस्पतालमा ५० भन्दा बढी चिकित्सक थप गरिएको सघन उपचार कक्ष, एचडियु तथा भेन्टिलेटर जस्ता सबै सुविधा सञ्चालनमा ल्याइएको जानकारी दिँदै मुख्यमन्त्री पौडेलले अब मुटु रोग तथा अर्बुद रोग (क्यान्सर)को उपचारको छुट्टै युनिट सञ्चालनका लागि प्रदेश सरकारले काम गरिरहेको बताए । प्रदेश सरकारले हेटौंडा अस्पतालमा ६ तले नयाँ भवन निर्माणको शुरुआत गरिसकेको जानकारी मुख्यमन्त्री पौडेलले दिए । स्वास्थ्य क्षेत्रमा आमूल परिवर्तन ल्याइएको भन्दै उनले प्रदेश सरकारले सञ्चालन गरेका १३ ओटै अस्पतालमा अक्सिजनको अभावमा ज्यान गुमाउनुपर्ने अवस्था सृजना हुन नदिने बताए । कार्यक्रममा सामाजिक विकासमन्त्री सरस्वती बस्नेतले सबैको सहयोगबाटै कोरोना नियन्त्रण र उपचारका लागि काम भइरहेको बताइन् ।
जिल्ला समन्वय समितिका प्रमुख रघुनाथ खुलालले अभावमा सहयोग गर्ने उद्योगपतिलाई धन्यवाद व्यक्त गरे । हेटौंडा उपमहानगरका प्रमुख हरिबहादुर महतले अक्सिजन अभावमा गुज्रेको अस्पतालमा यसअघि दैनिक २० सिलिन्डर उत्पादन गर्ने प्लाण्ट जडान गरिएको जानकारी दिँदै महामारीको जुटेर सामना गर्नुपर्नेमा जोड दिए । रासस
