काठमाडौं (अस) । नेपाल बैंकले गैरआवासीय नेपालीलाई लक्षित गरी सुविधासहितको एनआरएनए निक्षेप खाता सञ्चालनमा ल्याएको छ । विदेश बस्ने गैरआवासीय नेपालीले अब अनलाइनबाटै नेपाल बैंकमा विदेशी मुद्रामा बचत र मुद्दती खाता खोल्न सक्नेछन् ।
अमेरिकी डलर, पाउन्ड स्ट्रलिङ र अस्ट्रेलियन डलरमा नेपाल बैंकमा बचत तथा मुद्दती खाता खोल्दा उच्च ब्याज दिइने बैंकले बताएको छ । डलरमा बचत तथा मुद्दती खाता खोल्दा वार्षिक ब्याजदर क्रमशः ४.५ प्रतिशत र ६ प्रतिशत दिइनेछ भने अन्य विदेशी मुद्राको निक्षेपमा पनि आकर्षक ब्याजदर दिइनेछ ।
बचत तथा मुद्दती खाता दुवैमा न्यूनतम मौज्दात अमेरिकी डलर ५०० वा सो बराबरको अन्य विदेशी मुद्रा हुनुपर्नेछ । एनआरएन खाता गैरआवासीय नेपालीहरुले एकल तथा संयुक्त रूपमा तथा गैरआवासीय नेपालीबाट प्रवद्र्घित विदेशस्थित संस्थाको नाममा पनि खोल्न सकिने बैंकले जनाएको छ ।
हाल बैंकले २१३ शाखा, १४८ एटीएम, ४७ एक्सटेन्सन काउन्टरमार्फत बैंकिङ सेवा दिँदै आएको छ ।
