फागुन १२, काठमाडौं । एनआइबिएल म्युचुअल फण्ड अन्तर्गत सञ्चालित एनआइबिएल सहभागिता फण्डले माघ महीनाको खुद सम्पत्ति मूल्य विवरण बिहीवार सार्वजनिक गरेको छ ।
उक्त विवरण अनुसार फण्डले माघ मसान्तसम्ममा रू. ३० लाख ९४ हजार नोक्सानी व्यहोरेको छ । फण्डले पुस मसान्तसम्ममा रू. ५९ लाख २५ हजार नाफा कमाएको थियो । माघ महीनामा खर्चमा वृद्धि भएसँगै फण्ड नोक्सानीमा गएको हो । पुस मसान्तसम्ममा फण्डको कुल खर्च रू. ३९ लाख ४५ हजार रहेकोमा माघ महीनामा बढेर रू. ४६ लाख १३ हजार पुगेको छ ।
त्यसैगरी फण्डको आम्दानी पनि घटेको छ । पुस मसान्तसम्ममा फण्डले रू. ९८ लाख ७१ हजार आम्दानी भएकोमा माघ महीनामा घटेर रू. १५ लाख १९ हजार मा झरेको हो । फण्डको सूचीकृत शेयरमा लगानी भने पुस महीनाको तुलनामा माघ महीनामा बढेको छ ।
पुस मसान्तसम्ममा सूचीकृत शेयरमा रू. २७ करोड ९१ लाख लगानी गरेको उक्त फण्डको माघ मसान्तसम्ममा यो लगानी बढेर रू. २८ करोड ९३ लाख पुगेको छ । माघ महीनामा फण्डले लगानी गरेका कम्पनीहरुको शेयर मूल्यमा वृद्धि भएसँगै समग्र सूचीकृत शेयरमा गरेको लगानी बढेको हो ।
त्यसैगरी फण्डको प्रतिइकाई खुद सम्पत्ति मूल्य भने पुस मसान्तसम्ममा रू. १२ दशमलव ६२ रहेकोमा माघ महीनामा घटेर रू. १२ दशमलव ४० मा झरेको छ ।
