फागुन १२, काठमाडौं । नेपाल आयल निगमले सीमा क्षेत्रमा हुने इन्धनको तस्करी रोक्न पेट्रोल पम्पहरूले विद्युतीय माध्यमबाट मात्रै भुक्तानी लिने व्यवस्था मिलाउन आफ्ना डिपो तथा कार्यालयलाई निर्देशन दिएको छ ।
भारतीय सीमा जोडिएको क्षेत्रमा पेट्रोल र डिजेलको सीमा मूल्य अन्तर फराकिलो भएपछि आयल निगमले आफ्नो प्रादेशिक कार्यालय, इन्धन डिपो र शाखा कार्यालयलाई यस्तो निर्देशन दिएको हो ।
निगमका उप- निर्देशक विनितमणि उपाध्यायका अनुसार सीमा क्षेत्रमा भारतभन्दा नेपालतर्फ पेट्रोलको मूल्य प्रतिलिटर ३० रुपैयाँसम्म सस्तो छ । जसका कारण सीमानजिक नेपालका पम्पहरुबाट विक्री हुने पेट्रोल, डिजेल तस्करी भई भारत नै जाने गरेको निगमको दावी छ । पम्पहरुले विक्री वितरण गर्ने इन्धनलाई पारदर्शी बनाउन विद्युतीय भुक्तानी प्रणाली लागू गर्न लागिएको निगमले बताएको छ ।
भारतीय सीमाबाट २ किलोमिटर नेपालतर्फ रहेका निगमका सबै साधारण पम्प तथा नमूना विक्रेतालाई एक महीनाभित्र पेट्रोलियम पदार्थको विक्री वितरण गर्दा विद्युतीय माध्यमबाट भुक्तानी गर्ने व्यवस्था मिलाउन भनिएको निगमले जारी गरेको प्रेस विज्ञप्तिमा उल्लेख छ । साथै यसबारे प्रगति विवरण एकरएक महीनामा केन्द्रमा पठाउने व्यवस्था मिलाउन पनि निगमले निर्देशन दिएको छ ।
अन्तरराष्ट्रिय बजारमा कच्चा तेलको मूल्य उच्च विन्दुमा पुगेपछि आयल निगम निरन्तर घाटामा छ । निगमका अनुुसार मुलुकभर करीब १ हजार ६०० ओटा पम्पहरु सञ्चालनमा छन् । तीमध्ये करीब ६० प्रतिशत तराईका जिल्लामा छन् ।