कानून निर्माण प्रक्रियाबारे छलफल

काठमाडौं । संघीय संसद् राष्ट्रिय सभाको विधायन व्यवस्था समितिले काठमाडौं महानगरपालिकाको कानून तर्जुमा प्रक्रिया र कार्यान्वयनको अवस्थाको विषयमा छलफल गरेको महानगरले बताएको छ । समितिका सभापति वेदुराम भुसालको नेतृत्वमा आएको टोलीले महानगरका कार्यवाहक प्रमुख सुनिता डंगोलसँग भेट गरेर विधि निर्माण प्रक्रियाका विषयमा छलफल गरेको हो । ‘स्थानीय ऐन, कार्यविधि, निर्देशिका निर्माण कसरी भइरहेको छ । यसले संघीय ऐन निर्माणको प्रक्रियासँग राख्ने सम्बन्ध अनुगमन गर्ने हाम्रो काम हो । यसको थालनी काठमाडौं महानगरपालिकाबाट गरेका हौं ।’ छलफलमा समितिका सभापति भुसालले भने, ‘कुन कुन ऐन निर्माण भए ? ती ऐन निर्माणको आधार के हो ? कार्यान्वयन कसरी भइरहेका छन् भन्ने यी विषय हाम्रा सरोकार हुन् । महानगरपालिकाका प्रमुख उपप्रमुख राष्ट्रिय सभाका मतदाता पनि हुनुहुन्छ । उहाँहरूसँग अनुभव र सिकाइ आदान प्रदान गर्नु पनि हाम्रो उद्देश्य हो ।’ महानगरका कार्यवाहक प्रमुख डंगोलले अन्तरसरकार समन्वय, साझेदारी र सहकारितालाई बलियो बनाउने, राष्ट्र सेवकलाई सेवाप्रति समर्पित हुन प्रोत्साहन गर्ने लगायत स्थानीय सरकार सञ्चालन गर्न सहज हुने विभिन्न क्षेत्रगत विषयमा संघीय सरकारले कानून निर्माण गर्नुपर्ने धारणा राखेकी थिइन् । ‘वस्तुगत विषयमा आधारित स्थानीय सरकारका सवालमा संघीय सरकारले तर्जुमा गर्नुपर्ने कानूनी प्रबन्धका विषयमा लेखेर अनुरोध गर्नेछौं,’ उनले भनिन् । महानगरपालिकाले २०७२ सालको संविधान जारी भएपछि ऐन, कार्यविधि, नियमावली, कार्यविधि गरेर ८४ ओटा कानून तर्जुमा गरेको छ । यसमा केही संशोधन भएका पनि छन् ।