जेठ ५, नयाँदिल्ली (भारत) । कोरोना भाइरस महामारीको दोस्रो लहरबाट ठूलो क्षति व्यहोरिरहेको भारतमा विगत २४ घण्टामा थप चार हजार ५२९ जनाको मृत्यु भएको यहाँको स्वास्थ्य मन्त्रालयले जानकारी दिएको छ ।
मंगलवार त्यहाँ २ लाख ६७ हजार ३३४ जना थप संक्रमित थपिएका छन् । गएको केही दिनयता भारतमा कोरोना संक्रमितको संख्यामा केही कमी आएको भएयता पनि सोमवारको तुलनामा मंगलवार केही बढी संक्रमित भएका छन् ।
भारतमा सोमवार कोरोना संक्रमितको संख्या २ लाख ६३ हजार जना मात्र थियो भने मंगलवार पुनः २ लाख ६७ हजार ३३४ जना थप संक्रमित भएका छन् । गत सोमवार कोरोना संक्रमितको यो संख्या गत अप्रिल २१ तारिख पछिकै सबैभन्दा कमी भएको भारतको केन्द्रीय स्वास्थ्य तथा परिवार कल्याण मन्त्रालयले मंगलवार जानकारी दिएको थियो ।
केन्द्रीय स्वास्थ्य तथा परिवार कल्याण मन्त्रालयका अनुसार विगत २४ घण्टामा दुई लाख ६७ हजार ३३४ जना नयाँ संक्रमित भेटिएका हुन् ।अप्रिल महिनाको तुलनामा हरेक दिन संक्रमितहरुको संख्या घट्दै गएको देखिएको हो । अघिल्लो महीना यहाँ दैनिक कम्तीमा पनि ४ लाख मानिसमा संक्रमण देखिने गरेको थियो ।
मन्त्रालयले बुधवार सार्वजनिक भएको यो तथ्यांकसँगै भारतमा कोरोना भाइरसको संक्रमणबाट हालसम्म २ लाख ८३ हजार २४८ जनाको ज्यान गएको पनि बताइएको छ । मन्त्रालयका अनुसार कोभिड–१९ संक्रमितको कुल संख्या दुई करोड ५४ लाख ९६ हजार ३३० पुगेको छ ।
भारतमा गत जनवरी १६ बाट कोरोना भाइरसविरुद्धको खोप अभियान शुरु गरेको थियो । सो समयबाट हालसम्म भारतमा १८ करोड ५८ लाख ९ हजार भन्दा बढी खोप लगाईसकेका छन् ।
मंगलवार एकै दिनमा भारतमा १३ लाख १२ हजार १५५ जनालाई कोरोनाविरुद्धको खोप लगाएका सरकारी स्रोतले जानकारी दिएको छ ।
भारतमा संक्रमित व्यक्तिको संख्या दैनिक तीन लाखभन्दा बढी नै देखिए पनि भारत सरकारले देशव्यापी लकडाउन भने नगर्ने जानकारी दिएको छ । तर कतिपय शहरमा भने लगाइएको छ । रासस/सिन्ह्वा
