आज आइतबार प्रतिनिधिसभाको बैठक बस्दै छ । बैठक दिउँसो ११ बजे बोलाईएको छ । आजको बैठकमा महाभियोग प्रस्तावमाथि छलफल हुने भएको छ । आजको बैठकको कार्यसूचीमा प्रधान न्यायाधीश चोलेन्द्र शमशेर ज.ब.रा. विरुद्ध दर्ता भएको महाभियोगको प्रस्तावमाथि छलफल हुने उल्लेख छ । त्यस्तै सभामुखले राष्ट्रपतिको कार्यालयबाट प्राप्त विधेयक प्रमाणीकरण सम्बन्धी पत्रको व्यहोरा पढेर सुनाउने कार्यसूची रहेको छ। साथै कृषि, सहकारी तथा प्राकृतिक स्रोत समितिका सभापति पूर्ण कुमारी सुवेदीले “पशु स्वास्थ्य तथा पशु सेवा परिषद् विधेयक सम्बन्धी समितिको प्रतिवेदन, २०७९ ' पेश गर्ने र प्रधानमन्त्री शेरबहादुर देउवाले “महालेखा परीक्षकको उनन्साठीऔं वार्षिक प्रतिवेदन, २०७९' पेश गर्ने कार्यसूची छ।
